Një pacient nga Suhareka gjatë një aksidenti kishte pësuar lëndime të rënda në krahun e majtë, për të shpëtuar dorën e tij ekipi kujdestar i mjekëve në përbërje të kirurgut vaskular, anesteziologut, kirurgëve plastik dhe stafit infermieror kanë operuar dorën e tij për orë të tëra dhe dora e tij është riaftësuar.
“Ekipi mjekësor arrit ta riaftësoi gjymtyrën – krahun e pacientit, i cili tani ka dorën e gjallë, me vaskularizim, të inervuar dhe të lëvizshme. Pacienti kishte ardhur me të gjitha sistemet (sistemi neurovaskular, i muskulor dhe ai i tetivave) të shkëputura nga vazhdimësia, me një defekt të madh të lëkurës”, thuhet në njoftimin e ShSKUK-së.
“Ndërsa, lëndimi i strukturave ishte në nyjen radiokarpale (kyçi i dorës) aty ku edhe kalibri i enëve të gjakut është milimetrik, e të cilat fillojnë të futen në shuplakë dhe kjo e vështirësoi në masë të madhe shpëtimin e ekstremitetit tek pacienti, por rrezikoi dhe jetën e tij”, thuhet tutje.
Sipas njoftimit të ShSKUK-së rastet e tilla në literaturë janë të shoqëruara me shkallë të vdekshmërisë prej 72 përqind ndërsa “humbjet e ekstremiteteve janë me përqindje të lartë, mbi 90%”./Gazeta Shneta/
