Një studim i madh sugjeron se ndikimi i obezitetit nuk është i njëjtë tek të gjithë. Ndërsa mbipesha rrit rrezikun për sëmundje serioze si diabeti tip 2, sëmundjet e zemrës dhe hipertensioni, disa njerëz mbeten relativisht të shëndetshëm pavarësisht peshës së lartë.
Shkencëtarët nga Icahn School of Medicine në Mount Sinai dhe Universiteti i Kopenhagenit analizuan të dhëna gjenetike nga mbi 450,000 persona me origjinë evropiane.
Ata krahasuan nivelet e yndyrës trupore me treguesit e shëndetit metabolik, si presioni i gjakut, kolesteroli dhe sheqeri në gjak, duke identifikuar 266 variante gjenetike që “çlirojnë” obezitetin nga rreziku i sëmundjeve.
Me fjalë të tjera, individët me këto variante mund të shtojnë peshë, por nuk shfaqin shenjat paralajmëruese të sëmundjeve metabolike.
Sipas Euronews Health, studimi identifikoi gjithashtu tetë nënllojshmëri të obezitetit, secili me rreziqe unike shëndetësore, dhe tregoi se efektet mbrojtëse të varianteve gjenetike shfaqen edhe tek fëmijët, transmeton Gazeta Shneta.
Fëmijët me këto gjene ishin më të prirur ndaj obezitetit, por pa shenja të sëmundjeve metabolike.
Shkencëtarët planifikojnë të analizojnë popullsi më të ndryshme për të gjetur gjene të reja që ndikojnë yndyrën trupore pa lidhje me sëmundje si diabeti ose sëmundjet e zemrës.
Megjithatë, studiuesit theksojnë se kjo nuk do të thotë se obeziteti është i padëmshëm. Stili i jetesës, ushqimi dhe aktiviteti fizik mbeten kyç për shëndetin e përgjithshëm.
Sipas Organizatës Botërore të Shëndetësisë, në vitin 2022 një në tetë persona në botë jetonte me obezitet, i cili ka dyfishuar tek të rriturit dhe katërfishuar tek adoleshentët që nga viti 1990. /Gazeta Shneta/