Një vit pas trajtimit të parë në botë për glioblastomën, mjeku australian Richard Scolyer ka shpëtuar nga kanceri. Terapia eksperimentale e patologut të njohur ndërkombëtarisht bazohet në kërkimin e tij pionier mbi melanomën.
Glioblastoma e Prof. Scolyer ishte aq agresive sa shumica e pacientëve mbijetojnë më pak se një vit. Megjithatë, të martën, 57-vjeçari njoftoi se skanimi i tij i fundit MRI nuk tregoi përsëritje të tumorit. “Nuk mund të isha më i lumtur!!!!!” shkroi ai në një përditësim në rrjetet sociale, shkruan BBC, transmeton Gazeta Shneta.
Prof. Scolyer, së bashku me kolegen dhe mikeshën e tij Georgina Long, janë bashkëdrejtorë të Institutit Melanoma në Australi. Ata kanë bërë kërkime mbi imunoterapinë, e cila përdor sistemin imunitar të trupit për të sulmuar qelizat e kancerit. Ky hulumtim ka përmirësuar ndjeshëm rezultatet për pacientët me melanoma të avancuara në nivel global, me gjysmën e tyre tani të shëruar, nga më pak se 10%.
Në trajtimin e Prof. Scolyer, ekipi përdori një kombinim të imunoterapive dhe një vaksinë të personalizuar për karakteristikat e tumorit të tij. Ai është i pari pacient i kancerit të trurit që ka marrë imunoterapi të kombinuar para operacionit dhe një vaksinë të tillë.
Rezultatet kanë gjeneruar optimizëm se mund të jemi pranë një zbulimi që do të ndihmojë rreth 300,000 njerëz të diagnostikuar me kancer të trurit globalisht çdo vit. Megjithatë, Dr. Roger Stupp, mjeku që ka zhvilluar protokollin aktual për trajtimin e glioblastomave, ka theksuar se është ende herët për të thënë nëse trajtimi po funksionon plotësisht.
Prof. Scolyer dhe Prof. Long kanë pranuar se shanset për shërimin e plotë janë të vogla, por shpresojnë se trajtimi eksperimental do të zgjasë jetën e Prof. Scolyer dhe do të përkthehet në prova klinike për pacientët me glioblastoma. Rezultatet e deritanishme janë inkurajuese dhe mund të ndryshojnë ndjeshëm trajtimin e kësaj sëmundjeje të rëndë./ Gazeta Shneta/