Një mjek në SHBA është arrestuar dhe akuzuar për vrasje të shkallës së dytë, pasi dyshohet se gjatë një operacioni ka hequr gabimisht mëlçinë e pacientit në vend të shpretkës, duke i shkaktuar vdekjen.
Sipas autoriteteve në Florida, Thomas Shaknovsky është paditur nga një juri e madhe për lidhje me vdekjen e një pacienti 70-vjeçar nga Alabama, e ndodhur në sallën e operacionit.
Sipas mediave të huaja, ngjarja ka ndodhur më 21 gusht 2024, kur mjeku ishte planifikuar të kryente një operacion për heqjen e shpretkës (splenektomi).
Megjithatë, sipas hetimeve, ai ka hequr mëlçinë e pacientit, duke shkaktuar humbje masive të gjakut dhe vdekjen e menjëhershme të tij në tavolinën e operacionit.
Rasti është hetuar nga Walton County Sheriff’s Office në bashkëpunim me prokurorinë dhe autoritete të tjera shtetërore dhe mjekësore.
Pas një hetimi të zgjeruar, juria e madhe ka gjetur bazë të mjaftueshme për të ngritur aktakuzë ndaj mjekut për vrasje të shkallës së dytë, duke vlerësuar se veprimet e tij përbëjnë shkelje penale sipas ligjit në Florida.
Sherifi i qarkut, Michael Adkinson, ka deklaruar se institucionet do të ndjekin rastin deri në fund.
“Detyra jonë është të ndjekim faktet pa frikë dhe pa favorizime. Juria e madhe ka folur dhe përgjegjësia jonë është të sigurojmë që procesi ligjor të zbatohet në mënyrë të drejtë,” ka thënë ai.
Autoritetet kanë shprehur ngushëllime për familjen e viktimës, duke e cilësuar rastin si një humbje të rëndë dhe tragjike.
Ndërkohë, çështja pritet të vazhdojë në gjykatë, ku do të përcaktohet përgjegjësia penale e mjekut për këtë incident të rëndë në praktikën mjekësore./Gazeta Shneta/