Një mjek nga Mitrovica, Ilir Hajzeri, është ankuar për parregullësi në Kongresin e organizuar nga Oda e Mjekëve të Kosovës.
Kirurgu ka thënë se ndonëse e lanë repartin për të marr pjesë në kongres, kur shkuan aty së bashku me disa kolegë të tjerë nuk arritën të marrin pikët për rilicencim pasi emri i tyre nuk gjendej në listë, transmeton Gazeta Shneta.
“Duke filluar nga dita e caktuar ( ditë pune, ku shumicës i kushtëzohej ose pjesëmarrja për rilicencim ose prania në vendin e punës edhe pas kujdestarisë 24 orëshe dhe për fat të keq, pa dëshirën tonë sot shumë reparte mbetën pa staf shëndetësorë), pastaj turmat e krijuara me orë të tëra vetëm për të hyrë në Kongres, e deri tek mos gjetja e emrit në listën e mjekëve nga Oda e Mjekëve të Kosovës. Institucion ky i cili funksionon dhe paguhet nga ne mjekët edhe pse sot nuk ishim në listë. Ishte një organizim i dështuar dhe ofendues për ne, e që nuk është hera e parë që ndodhë diqka e tillë”, ka shkruar Hajzeri.
Lexoni reagimin e tij të plotë:
Nuk kaloi shumë kohë e gjatë prej se vendi ynë si e gjithë bota, u përball me një virus vdekjeprurës. Ishte vet koha që të jepte shembullin më të mirë të fjalëve “Shëndeti mbi të gjitha”. Ngado që shkoje dëgjoje fjalë të tilla që ne si mjek në veqanti, si dhe i gjithë personeli shëndetësorë përfaqësonim “Heronjët e heshtur”. Por ende pa u tejkaluar plotësisht kjo situatë siq duket ndërruan mendje.
Sot me datë 3 qershorë, në qytetin e Prishtinës, ishte organizuar Kongresi i Tretë i Mjekësisë. Pjesëmarrja, ani pse ishte në një formë e obliguar, për shkak se ndaheshin pikët për rilicencim të mjekëve, për disa nuk u mundësua diqka e tillë. Si unë ashtu edhe shumë mjekë të tjerë aty hasëm në pakënaqësi dhe sjellje ofenduese ndaj profesionit tonë human, nga një numër i caktuar individësh organizatorë. Duke filluar nga dita e caktuar ( ditë pune, ku shumicës i kushtëzohej ose pjesëmarrja për rilicencim ose prania në vendin e punës edhe pas kujdestarisë 24 orëshe dhe për fat të keq, pa dëshirën tonë sot shumë reparte mbetën pa staf shëndetësorë), pastaj turmat e krijuara me orë të tëra vetëm për të hyrë në Kongres, e deri tek mos gjetja e emrit në listën e mjekëve nga Oda e Mjekëve të Kosovës. Institucion ky i cili funksionon dhe paguhet nga ne mjekët edhe pse sot nuk ishim në listë. Ishte një organizim i dështuar dhe ofendues për ne, e që nuk është hera e parë që ndodhë diqka e tillë. Por pavarësisht kësaj ne do vazhdojmë punën tonë për shkak të ndërgjegjes dhe përgjegjësisë sonë morale që ndjejm, ani pse persona të tillë tentojnë ta njollosin atë!