Moderatori dhe gazetari i Top Channel Eno Popi ka dhënë një intervistë për Revista WHO, ku ndër të tjera ka treguar edhe disa peripeci që ka kaluar si prind për herë të parë.
Fiks një vit më parë në jetë erdhi Liv, e cila lindi në SHBA, ku bashkëshortja e Enos, Atena, kishte shkuar pak kohë para lindjes.
Në atë kohë gazetari nuk ishte pranë tyre dhe shkoi disa ditë më vonë, mirëpo këtë nuk e ka përjetuar edhe aq mirë.
“Ishte një nga vendimet më të vështira për mua, që më ka peshuar pafund në ndërgjegje muajt pasardhës. Pengje të tilla, mbeten aty dhe nuk e kthejnë dot kohën pas”, ka rrëfyer Eno.
Më tej ai ka treguar se jeta i ka ndryshuar totalisht pasi fëmijët kërkojnë kujdes maksimal dhe ekziston gjithmonë frika nëse ke vepruar drejt apo jo.
“Për mua, që nga ai çast jeta është bërë më e komplikuar, por me plot dashuri. Nuk mohoj dot që edhe emocionalisht kam përjetuar ulje-ngritje të forta, deri ekzistenciale. A jam një baba që po bëj gjithçka mirë? Ka ditë që nga pagjumësia, bota duket sikur më kthehet kundër por gjithçka zhbëhet nga e qeshura, përqafimi, belbëzimet apo hapat e parë. Kisha dëgjuar vazhdimisht nga ata që e kanë përjetuar prindërimin më përpara, se fëmija të ul egoizmin në tokë, dhe në fakt kështu ndodh. Liv, si çdo fëmijë në familje, është në qendër të vëmendjes dhe përkushtimit. Deri përpara se të nisnim bashkëjetesën të tre, kam patur për shkak të punës orare krejt të ndryshme, nga mëngjesi deri në mbrëmje. Tani duket sikur gjithçka është përmbysur. Mëngjeset tona janë më të qeta, darkat më të kufizuara dhe nata na kthen në roje tek koka e vajzës.”
Gazetari ka rrëfyer se përshtatjen në fillim e ka pasur me trauma të vogla dhe mund të jetë prekur nga depresioni post-partum që përfshin edhe baballarët.
“Nuk e di a ka një depresion post edhe tek baballarët, por ndryshimi radikal i të përditshmes më ka ndikuar jo pak. Përpiqem të jem sistematik si natyrë dhe heqja dorë nga rutina, takimet dhe koha e shpenzuar me njerëz jashtë shtëpisë, fillimisht më shkaktonin nervozizëm, por paralelisht rritej dita-ditës dëshira për t’u kthyer në shtëpi e për të shpenzuar kohë më shumë në jetën e re”, ka rrëfyer ai.