Klinika e Ortopedisë në Qendrën Klinike Universitare të Kosovës më 20 korrik 2022 është pajisur me tavolinën ortopedike moderne, përmes së cilës mundësohen trajtimet kirurgjike të boshtit kurrizor.
Kontrata ndërmjet Shërbimi Spitalor Klinik Universitar dhe Operatorit Ekonomik “Agani L.T.D” në një vlerë prej 79 mijë e 400 euro ishte nënshkruar më 15 shkurt 2022, dhe kompania fituese e tenderit ka qenë e obliguar që brenda 45 ditëve të liferojë tavolinën në klinikën përkatëse megjithatë një gjë e tillë nuk ndodhi. Kompania liferimin e bëri pas pesë muajve vonesë.
Për vonesën në liferim kompania ka dhënë disa arsyetime, madje e ka cilësuar si kohë rekorde liferimin me këtë pajisje mjekësore pasi që sipas tyre për një tavolinë të tillë në shtete perëndimore presin 6 deri në 12 muaj.
“Gjendja rënduar me furnizim të lëndës së parë në tregun botërorë, gjendja shumë e vështirësuar me transportet ndërkombëtare, tavolina shumë specifike dhe e sofistikuar e cila prodhohet vetëm me kërkesë, problemet globale të shkaktuara nga Pandemia si në furnizime po ashtu edhe në fuqinë punëtore, si dhe gjendja e rënduar në Evropë për shkak të zhvillimeve në Ukrainë”, arsyetohet kompania në një përgjigje për Gazetën Shneta.
Megjithatë, si pasojë e mungesës së kësaj tavoline, nga Fondi për Sigurime Shëndetësore thonë se gjatë këtyre pesë muajve, shkurt-korrik 16 pacientë janë referuar për trajtim jashtë vendit pasi që shërbimet mjekësore për pacientët me probleme në boshtin kurrizor nuk mund të ofroheshin pa tavolinën ortopedike, e që trajtimi i tyre i ka kushtuar Kosovës rreth 300 mijë euro.
Raste të ngjashme ka edhe për probleme tjera, të cilat nuk mund të trajtohen në institucione shëndetësore në vend për shkak të mungesës së aparaturave apo mos lifermit të tyre në kohën e përcaktuar sipas kontratës.
Në anën tjetër, SHSKUK në njoftimin për furnizim me tavolinën ortopedike shprehej optimiste se rastet për referime jashtë vendit do të zvogëlohen.
Sa i përket vonesave në liferminin e tavolinës nga sektori i prokurimit të Qendrës Klinike Universitare të Kosovës thonë se janë në pritje të raportit nga menaxheri i kontratës për të proceduar me penalizim.
“Jemi në pritje të raportit nga menaxheri i kontratës për të proceduar me ndëshkimet që parasheh kontrata”, thonë për Gazetën Shneta.
20.07.2022
Shërbimi Spitalor Klinik Universitar i Kosovës në vazhdimësi ka probleme në zbatimin e kontratave për shëndetësi dhe jo vetëm e për të cilat pasojat i bartin pacientët. /Gazeta Shneta/
Ky hulumtim është realizuar në kuadër të projektit të KDI-së “Promovimi i integritetit në proceset e prokurimit publik në kohë pandemie”