Ministria e Shëndetësisë dhe SHSKUK nuk e kanë aplikuar praktikën e rotacionit për ndërrimin e përfaqësuesit të spitaleve rajonale në Bordin Drejtues. MSh dhe SHSKUK nuk kanë dhënë sqarim, përveçse është thënë se anëtari Besim Demolli ka shprehur vullnetin e tij për të qenë edhe më tutje pjesë e Bordit.
Bordi Drejtues i Shërbimit Spitalor Klinik dhe Universitar emërohet nga Qeveria e Kosovës me propozimin e ministrit të Shëndetësisë në bazë të Ligjit për Shëndetësi dhe Statutit të këtij institucioni. Bordi aktual është emëruar nga Qeveria në prill të këtij viti, shkruan Gazeta Shneta.
Bordi përbëhet nga shtatë anëtarë dhe njëri prej tyre përfaqëson spitalet rajonale. Sipas Ligjit për Shëndetësi, Neni 64, pika 3.4: një (1) përfaqësues nga Spitalet rajonale, në bazë të rotacionit dhe përmbushjes së indikatorëve të kualitetit të shërbimeve shëndetësore. Njëjtë e thotë edhe Statuti i SHSKUK-së.
Në mandatet e kaluara Bordi pothuajse në të gjitha rastet e ka aplikuar rotacionin për përfaqësuesin e spitaleve rajonale çdo gjashtë muaj. Por kësaj radhe rotacioni nuk është aplikuar, ndonëse kanë kaluar gjashtë muaj nga emërimi i këtij organi drejtues nga Qeveria.
Gazeta ka pyetur Ministrinë e Shëndetësisë dhe Bordin Drejtues për këtë çështje, por asnjëra nuk kanë dhënë sqarim pse nuk është aplikuar rotacioni, përveç se është thënë se përfaqësuesi aktual Besim Demolli ka shprehur vullnetin e tij për të qenë edhe më tutje pjesë e Bordit.
“Ju njoftojmë se, nëse z. Besim Demolli shpreh vullnetin e tij për të qenë edhe tutje pjesë e Bordit të ShSKUK-së, në përputhje me rregullat dhe procedurat, do të vazhdohet mandati i tij”, thuhet në përgjigjen e MSh-së.
Ndërkaq kryesues i Bordit i cili është edhe Sekretar i MSh-së, Naim Bardiqi, ka thënë se vendimi për themelimin e Bordit është nxjerr nga Qeveria në përputhje me Ligjin për Shëndetësi dhe statutin e SHSKUK-së, duke mos dhënë sqarime tjera për çështjen e përfaqësuesit të spitaleve rajonale.
Gazeta për këtë çështje i është drejtuar edhe Zyrës së Kryeministrit, por të njëjtit nuk kanë kthyer përgjigje tash e dy javë. Ndërsa edhe Demolli nuk i ka kthyer përgjigje Gazetës për këtë çështje. /Gazeta Shneta/