Edhe këtë javë specializantët e kanë nisur më protesta para Ministrisë së Shëndetësisë. Për të dytën javë me radhë mantelbardhët po protestojnë për mospagesën e kujdestarive sipas Ligji të ri të Pagave si dhe për mospagesën e kujdestarive me subvencione prej muajit shkurt.
Arianit Zajmi, nga Këshilli Organizativ, ka thënë për Radio Kosovën se do të vazhdojnë më protesta deri në realizimin e kërkesave të tyre.
“Dy janë kërkesat tona kryesore: Vendimi për detyrim të pagesës për shkollim specialistik, që është 500 euro, të hiqet nga Ministria e Shëndetësisë. Dhe për specializantët që vijnë nga Maqedonia e Veriut, Mali i Zi dhe Shqipëria pagesa në vlerë prej 1 mijë euro të hiqet. Po ashtu e njëjta kategori e specializantëve nuk kanë marrë asnjë cent nga muaji shkurt për kujdestarit e mbajtura”, ka thënë Zajmi.
Edhe Veton Kurti, specializant në Radiologji, thotë se mos pagesa e kujdestarive të vikendeve për specializantë, si dhe çmimet e larta për shkollim specialistik, lidhen direkt me ikjen e mjekëve nga Kosova.
“Çdo dy ditë pothuajse Kosovën e lëshon nga një mjek e kjo lidhet me kushtet e punës, çmimet e larta për specializim si dhe mos pagesën e kujdestarive për specializantë. Punojmë nga 24 orë, kujdestarit nuk paguhen dhe po ashtu vikendet nga muaji mars i këtij viti nuk na janë paguar fare”, ka thënë Kurti.
Ndërsa Ministria e Shëndetësisë në një përgjigje me shkrim për Radio Kosovën ka thënë se gjatë kësaj jave pritet të finalizohet përgatitja e aneks-kontratave.
“Me qëllim të adresimit të pagesës së kujdestarive, Ministri i Shëndetësisë ka nxjerrë vendim për kompensim, ku kjo çështje do të rregullohet me kontratë. Përgatitja e aneks-kontratave pritet të finalizohet gjatë kësaj jave, në mënyrë që të adresohet çështja e specializantëve me vetë financim mbështetur në vendimin e lartpërmendur”, thuhet në përgjigjen e Ministrisë së Shëndetësisë.
Protesta të specializantëve do të mbahen çdo ditë nga ora 10:00 deri në ora 11:00, nga e hëna deri te premten para objektit të Ministrisë së Shëndetësisë./RTK/