Ministria e Shëndetësisë ka anuluar lotet e tenderit për furnizim me pajisje të IVF-së për Klinikën e Gjinekologjisë në QKUK.
Ministria e Shëndetësisë ka anuluar tre lotet që parashiheshin për furnizim me pajisje për fertilizim të asistuar mjekësor për Klinikën e Gjinekologjisë në QKUK, shkruan Gazeta Shneta.
Lotet 1, 2, 3, 4, 33 dhe 34 të tenderit me titull “Furnizim me pajisje mjekësore, instrumente mjekësore për Njësitë organizative të QKUK-së”, janë anuluar me vendim të MSh-së më datën 21.08.2023.
Në këtë vendim janë anuluar edhe disa lote tjera për furnizim me pajisje për Klinikën e Oftalmologjisë. Të gjitha lotet janë anuluar me arsyetimin “për mungesë të ofertave të përgjegjshme”.
Me këtë tender parashihej blerja e pajisjeve dhe aparaturave për sallën dhe laboratorin e shërbimit të frytnimit të asistuar mjekësor në Klinikën e Gjinekologjisë në QKUK.
Ministri i Shëndetësisë Arben Vitia para disa javësh ka deklaruar se ky shërbim do të funksionalizohet brenda vitit, por kishte theksuar se mund të ketë vonesa në procedurat e prokurimit.
“Procedurat janë duke shkuar sipas planit. Natyrisht, këto janë procedura të prokurimit dhe ne nuk kemi mundësi as t’i shtyjmë e as t’i bëjmë më shpejt ose më ngadalë, sepse janë procedura që e kanë rrjedhën e vet. Për momentin, punët janë duke shkuar sipas planit dhe nëse do të ketë vonesa ato do të jenë nga prokurimi, mirëpo ne i kemi marrë të gjitha masat që të mos ketë vonesa”, ka deklaruar Vitia për Radion Evropa e Lirë.
Për këtë projekt të nisur në vitin 2020 janë përfunduar punimet në infrastrukturë, ndërsa pritet të pajiset edhe me aparaturë. Shërbimi i IVF-it në Gjinekologji do të jetë i pari shërbim i këtij lloji në spitalet publike, pasi i njëjti deri më tani është kryer vetëm në institucionet private. /Gazeta Shneta/