Ministria e Shëndetësisë ka nisur zbatimin e Ligjit për çmimin e produkteve medicinale duke hapur thirrjen për deklarimin e çmimeve nga kompanitë e barnave.
Ministri i Shëndetësisë Arben Vitia ka marr vendim për hapjen e fazës së deklarimit të çmimeve për produktet medicinale sipas Nenit 7 të Ligjit për çmimet e produkteve medicinale, shkruan Gazeta Shneta.
“Shpallet e hapur faza e deklarimit të çmimeve për produktet medicinale në afat prej 10 ditëve kalendarike duke filluar prej datës 02.04.2024”, thuhet në vendimin e ministrit.
Në nenin 7 të Ligjit, pika 1, përcaktohet se “Deklarimi i çmimit bëhet nga ana e bartësit të autorizimit për marketing në Kosovë apo përfaqësuesit me autorizim të bartësit të autorizim marketingut”.
Pikat tjera të Nenit 7:
2. Bartësi i autorizimit për marketing në Kosovë apo përfaqësuesi me autorizim të bartësit të autorizim marketingut dorëzon deklarimin e çmimit me shumicë për të gjitha produktet medicinale që posedojnë autorizim për marketing që regjistrohen sipas akteve ligjore përkatëse pranë AKPPM-së.
3. Bartësi i Autorizimit për Marketing në Kosovë, apo përfaqësuesit e autorizuar të tyre obligohen të bëjnë deklarimin e rregullt vjetor për çmime të produkteve medicinale përveç kur aplikojnë për autorizim marketing për herë të parë ku njëkohësisht me aplikimin për autorizim marketing duhet të bëjnë edhe deklarimin e çmimit sipas afateve të përcaktuara me këtë ligj dhe aktet nënligjore të miratuar nga Ministri.
4. Procedura, formati, aplikimi i deklarimit / ri deklarimit të çmimit dhe aplikimit për ndryshim të çmimit të produktit, përcaktohet me vendim të nxjerrë nga Ministri.
5. Deklarimi i çmimit vlen më së shumti për një (1) vit kalendarik. /Gazeta Shneta/