Mos furnizimi me barna nga Lista Esenciale e Barnave dhe materialeve shpenzuese është duke vazhduar në institucionet shëndetësore parësore në vend.
Mungesa e barnave esencial është duke detyruar pacientët t’i blejnë barnat e në anën tjetër Kosova nuk ka ligj për përcaktimin e çmimit të barnave në barnatoret private.
Për rreth tre muaj me radhë Ministria e Shëndetësisë ka dështuar të furnizoj me 16 artikuj medicinal Qendrën Kryesore të Mjekësisë Familjare në Komunën e Gjilanit.
Kujdesi Parësor Shëndetësor në Gjilan nuk është furnizuar nga Ministria e Shëndetësisë me këto produkte medicinale, Sol.NaCl 0.9%, Sol.Ringer, Amp Aminophylline, Amp Diazepam, Amp Diclofenac, Amp Furosemide, Amp Aminophylline, Amp Adrenaline, Flc Ceftraxone, Tbl Metformine, Tbl Omeprazol, Tbl Ac.Acetylsalycilic, Tbl Atorvastatine, Lingv.Nitroglicerin, Tbl Levothyroxine dhe Shpatulla.
Për të përmbushur kërkesat e pacientëve shumica e artikujve janë blerë nga buxheti komunal.
“Shumicën prej këtyre artikujve i kemi blerë nga buxheti vetanak, por MSh, nuk na ka furnizuar. Sepse muaj pas muaji furnizimi ndryshon, një produkt hyn e tjetri del, por furnizimi nuk është konsistent”, konfirmon drejtoresha e QKMF-së, Arbenita Hajdari për Gazetën Shneta.
Përveç Komunës së Gjilanit edhe komunat tjera janë të detyruar t’i blejnë artikujt medicinal me të cilët nuk i furnizon Ministria e Shëndetësisë, e cila është përgjegjëse për Kujdesin Parësor Shëndetësor.
Mungesa e barnave nga Lista Esenciale dhe materialeve shpenzuese përveç Kujdesit Parësor Shëndetësor është i theksuar edhe në atë dytësor e tretësor e në anën tjetër nga ministria thonë se kërkesat për furnizim me barna ka arritur deri në 75 përqind ndërsa furnizimi me materiale shpenzuese ka arritur në 85 përqind.
Spitalet Regjionale e Klinikat e QKUK-së janë duke u ballafaqur edhe me mungesë të Testeve Rapide të nevojshëm për të identifikuar nëse pacienti është i infektuar nga coronavirusi.
Për mosfurnizimin me artikuj medicinal Gazeta ka kërkuar sqarim edhe nga Ministria e Shëndetësisë mirëpo të njejtët nuk janë përgjigjur deri në publikimin e këtij artikulli.
Gazeta në vazhdimsi raporton për mungesën e barnave dhe materialeve në insstitucionet shëndetësore publike në vend. /Gazeta Shneta/