Ministria e Shëndetësisë ka paralajmëruar 6 tenderë në vlerë mbi 30 milionë euro për ndërtimin e objekteve shëndetësore.
Gjashtë tenderë në blerë 30 milionë e 150 mijë Euro janë paralajmëruar nga Ministria e Shëndetësië për t’u shpallur javëve në vazhdim, shkruan Gazeta Shneta.
Këta tenderë pritet të shpallen për ndërtimin ose vazhdimin e ndërtimit të objekteve spitalore dhe institucioneve tjera shëndetësore në disa komuna.
Tenderi me vlerën më të lartë është vazhdimi i ndërtimit të objektit të ri të Emergjencës në QKUK. Për vazhdimin e këtyre punimeve janë planifikuar 15.8 milionë Euro. Në dokumentin e Njoftimit Paraprak përveç kostos dhe datës së hapjes së tenderi më 20 mars, nuk janë dhënë më shumë detaje rreth projektit.
Kujtojmë se ky objekt kishte filluar së ndërtuari në vitin 2016. Kompania që e kishte fituar tenderin ishte tërhequr nga kontrata dhe objekti ka mbetur i pa përfunduar që disa vite. Për përfundimin e objektit ishte hapur edhe një tender në vlerë rreth 19 milionë Euro në fund të vitit 2020 në kohën kur MSH udhëhiqej nga ish-ministri Armend Zemaj. Objekti synohej të dedikohej për pacientët e sëmurë me Covid-19 për të rritur kapacitetet spitalore. Por ky tender u anulua më pas me arsyetimin e mungesës së buxhetit.
Tenderi tjetër me vlerën më të lartë është ai për ndërtimin e objektit të Institutit Special në Shtime në vlerë 8 milionë Euro. Edhe për këtë procedurë nuk janë dhënë më shumë detaje përveç se do të hapet më 12 prill të këtij viti.
Tenderët tjerë janë: Ndërtimi i QKMF-së në Istog në vlerë 2.5 milionë Euro, Ndërtimi i QKMF-së në Drenas në vlerë 2.1 milionë Euro, Ndërtimi i QKMF-së në Shtime në vlerë 1 milion e 250 mijë Euro, dhe Ndërtimi i Spitalit të Pediatrisë në Mitrovicë (vazhdim i projektit) në vlerë 500 mijë Euro.
Të gjitha këto procedura pritet t’i kushtojnë buxhetit të MSH-së hiq më pak se 30 150 000 Euro. /Gazeta Shneta/