Një studim i ri ka zbuluar se mungesa e vitaminës D, sidomos në fazat e hershme të jetës, lidhet me rritjen e rrezikut për zhvillimin e sëmundjeve autoimune si diabeti i tipit 1.
Hulumtimi, i publikuar në “Science Advances”, dhe kryer në modele me minj, tregon se mungesa e vitaminës D ndikon në zhvillimin e qelizave T – një lloj qelizash të bardha të gjakut që rregullojnë sistemin imunitar, transmeton Gazeta Shneta.
Në kushte normale, qelizat T dallojnë qelizat e shëndetshme nga ato të infektuara. Por mungesa e vitaminës D shkakton një përgjigje të tepruar imune, duke i bërë qelizat T të sulmojnë indet e shëndetshme, një proces i njohur si autoreaktivitet, sipas burimit Medical News Today.
Shkencëtarët theksojnë se ky efekt është i lidhur me ndikimin e vitaminës D në timus, gjëndrën që ndihmon në maturimin e qelizave T.
Vitamina D është e njohur kryesisht për rolin e saj në forcimin e kockave, por studimi i ri e thekson rëndësinë e saj në funksionimin normal të sistemit imunitar.
Autorët thonë se gjetjet mund të hapin rrugë për qasje të reja në parandalimin e sëmundjeve autoimune tek njerëzit me mungesë të kësaj vitamine thelbësore. /Gazeta Shneta/