Institucionet Shëndetësore Publike në Kosovë janë të stërvjetëruar si pasojë e mungesës së renovimeve e mirëmbajtjes për më tepër se 20 vite.
Përveç infrastrukturës Kujdesi Parësor Shëndetësor është në mungesë të theksuar të personelit e barnave nga Lista Esenciale e Barnave dhe Materialeve Shpenzuese.
Në një gjendje të rëndë është edhe Qendra e Mjekësisë Familjare II në Komunën e Ferizajt.
Sapo të hysh në dhomën për infuzione në këtë qendër ajo që të bie në sy janë muret e dëmtuara, papastërtia dhe mbajtëset e infuzioneve të ndryshkura, ka raportuar një pacient.
Raportuesi ka dërguar fotografi në Gazetën Shneta përmes të cilave shihet gjendja e rënduar infrastrukturore e papastërtisë në këtë qendër.
Në dhomën e infuzionit në këtë qendër janë tre shtretër dhe rrjedhimisht vetëm tre pacientë mund të marrin infuzion ndërsa pjesa tjetër e pacientëve duhet të presin deri sa të lirohet ndonjë shtrat, një gjë e tillë shpesh herë krijon tollovi për shkak të rradhëve që krijohen në këtë qendër. Situatë e ngjashme është pothuajse në të gjitha qendrat mjekësore në Kosovë.
Mungesa e hapësirave pamundëson edhe zgjerimin e kapaciteteve.
Përveç infrastrukturës së dobët, mungesës së personelit kjo qendër, njësoj si shumica e qendrave në nivel vendi, është duke u ballafaquar me mungesë të barnave nga Lista Esenciale dhe Materialeve Shpenzuese.
Ministria e Shëndetësisë është përgjegjëse për furnizimin me barna nga Lista Esenciale e Barnave dhe Materialeve Shpenzuese për të gjithë Kujdesin Parësor Shëndetësor në nivel vendi. Pavarësisht kësaj, qendrat shëndetësore kanë mungesë të theksuar të barnave.
Pacienti i cili ka dërguar fotografi të cilët tregojnë gjendjen e rënduar infrastrukturore në QMF II në Ferizaj gjithashtu ka treguar se për të marrë një infuzion është detyruar të blejë disa lloje të tretësve.
Sipas udhëzimit të tij, ai ka blerë Sol NaCl 0,9 për qind, Patroprazol ampullë, Beviplex ampullë, Dexason ampullë, Ascorbit ampullë dhe Palonosetron ampullë – për të gjitha këto, ai thotë se ka paguar rreth 20 euro.
Udhëzimi për blerje të tretësve QMF II – Ferizaj 26.09.2022
Gazeta ka dërguar pyetje tek menaxhmenti i qendrës, por deri në publikimin e këtij artikulli nuk ka pranuar përgjigje.
Qendra Kryesore e Mjekësisë Familjare në Ferizaj pothuajse në vazhdimsi ka mungesë të barnave e materialeve, për të cilat Gazeta ka raportuar. /Gazeta Shneta/
VIDEO: QKMF në Ferizaj në mungesë të tretësit për infuzion dhe hapësirës së ngushtë