Kryetari i Lidhjes Demokratike të Kosovës Isa Mustafa, ka reaguar për çmimin 200 euro për testin Covid, në laboratorin “Medical”, i cili dyshohet se është në pronësi të familjarëve Devolli.
Mustafa në reagimin e tij ka kritikuar ministrin e Shëndetësisë Armend Zemaj, pasi Ministria e shëndetësisë doli me një sqarim duke arsyetuar çmimin e testit prej 200 eurosh duke thënë se është i metodës rapide, shkruan Gazeta Shneta.
“Virusi Covid-19 nuk është një e mirë luksi, që përballohet dhe konsumohet nga ata që kanë para. Është një fatkeqësi me të cilën po bërballen qytetarët, pa dallim. Prandaj askush nuk mund të bishtërojë përgjegjësinë për çmimet që u caktohen qytetarëve. Në vend të arsyetimeve, institucionet përgjegjëse duhet të marrin veprime që të eliminohet çdo diskriminim i qytetarit, qofte me çmime të larta të pabaza, çoftë me marrëveshje të fshehta të eliminimit të konkurrencës, të atyre që janë licencuar”, ka shkruar Mustafa. /Gazeta Shneta/