Ministri i Shëndetësisë Armend Zemaj, ka vizituar sot mjekimin intensiv qendror ku po trajtohen pacientët me Covid-19 në gjendje të rëndë.
Zemaj bashkë me drejtorin e SHSKUK-së Valbon Krasniqi, këshilltarin e tij Saudin Maliqi i cili është edhe drejtor i Klinikës së Kirurgjisë Torakale, nuk janë pritur nga drejtori i Klinikës së Anestezionit Nehat Baftiu, por nga anesteziologu Naim Kuqi, shkruan Gazeta Shneta.
Zemaj në postimin e tij në Facebook e ka prezantuar Kuqin si u.d. shef të Klinikës së Anesteziologjisë dhe Mjekimit Intensiv. Por në fakt Kuqi aktualisht është i angazhuar vetëm si shef i intensivës Covid, ndërkaq pozitën e shefit të Mjekimit Intensiv Qendror e mban Dr. Shaqir Uka.
“Në Klinikën e Anesteziologjisë dhe Mjekimit Intensiv në SHSKUK në Prishtinë pashë nga afër trajtimin mjekësor që po iu ofrohet të prekurve nga Covid19 dhe pacientëve që trajtohen me respiratorë. Dr. Naim Kuqi u.d. shef i kësaj klinike prezantoi shërbimet që po kryhen në këtë klinikë, gjendjen e pacientëve, vështirësitë dhe nevojat e stafit mjekësor”, ka shkruar Zemaj.
Kujtojmë se Naim Kuqi ishte shkarkuar nga pozita e shefit të MIQ-it pas akuzave të familjarëve për vdekjen e ish-ushtarit të UÇK-së Avni Hyseni.
Për këtë rast pati hapur hetime edhe Prokuroria e Shtetit, por ky proces zyrtarisht ende nuk ka marr ndonjë epilog. /Gazeta Shneta/
