Ka ndërruar jetë zëvendësdrejtoresha e Institutit Kombëtar të Shëndetit Publik të Kosovës Prof. Selvete Hoxha-Krasniqi.
Lajmin e kanë bërë të ditur familjarët e të ndjerës, të cilët kanë njoftuar se Hoxha-Krasniqi ka ndërruar jetë sot, shkruan Gazeta Shneta.
“Njoftojmë miqtë dhe familjarët se sot me datë 11.01.2022 ndërroi jetë ma e dashura jonë, Prof. Dr. Selvete Hoxha Krasniqi. Në këtë dhembje të madhe ngushëllimin e gjejmë në kujtimet e bukura dhe dashurinë e pafund që e ka sjellë në jetërat tona. Varrimi bëhet të enjten në ora 12:00 në varrezat e Prishtinës. Për shkak të situatës aktuale me pandeminë e pamja nuk do të mbahet”, thuhet në njoftimin e familjes.
Ngushëllime kanë shprehur ish-kolegët e saj. Shefi i zyrës së OBSH-së në Sofje, Dr. Skender Syla, e ka vlerësuar lartë kontributin e saj në fushën e shëndetit publik.
“Sot paska ikur në amshim Profesoresha e nderuar, Selvete Hoxha Krasniqi, duke na lënë thellësisht të pikëlluar. Faleminderit për kontributin tuaj të vazhdueshëm në shëndetin publik dhe të mjedisit. Do të kujtoj përherë me respektin më të lartë”, ka shkruar Syla.
Ngushëllime ka shprehur edhe drejtori i IKSHPK-së, Prof. Naser Ramadani. “Pikëllim e dhembje për humbjen e madhe të Prof. Dr. Selvete Krasniqi, shoqe e sinqertë, kolege e madhe, profesioniste e humaniste e vërtetë! Lavdi veprës, punës dhe kontributit profesional e njerëzor! Ngushëllime Familjes e kolegëve!”, ka shkruar Ramadani.
Profesoresha e ndjerë ka qenë specialiste në Ekologji humane dhe shëndeti publik. Vite më parë ka shërbyer edhe në pozitën e zëvendësdrejtoreshës së IKSHPK-së. Ndërkaq që prej disa kohe e ndjera ka qenë në pension. /Gazeta Shneta/