Agjërimi i ndërprerë është bërë trendi më i madh dietetik i dekadës, duke premtuar përfitime shëndetësore pa nevojën e numërimit të kalorive ose kufizimit të karbohidrateve.
Thjesht ndryshon koha kur hani, jo domosdoshmërisht atë çfarë hani. Ndër të njohurit që e praktikojnë janë figura të teknologjisë dhe yje të Hollivudit. Madje, ish-kryeministri britanik Rishi Sunak ka treguar se nisi javën e tij me një agjërim 36-orësh.
Hulumtimet e mëparshme sugjeronin se zgjatja e agjërimit gjatë natës mund të përmirësojë metabolizmin, të ndihmojë riparimin qelizor dhe potencialisht të zgjasë jetën. Por nutricionistët paralajmërojnë se heqja e vakteve nuk është zgjidhje magjike dhe mund të jetë e rrezikshme për ata me sëmundje të mëparshme.
Agjërimi i ndërprerë zakonisht kufizon kohën e të ngrënit në rreth 8 orë, duke lënë një boshllëk prej 16 orësh pa ushqim. Të tjera dieta me kohë të kufizuar, si plani 5:2, kufizojnë kaloritë në ditë të caktuara dhe jo në orë.
Por një studim i madh i ri, i bazuar në të dhënat e më shumë se 19 mijë të rriturve, tregon një rrezik të shtuar për shëndetin e zemrës. Ata që kufizuan ngrënien nën 8 orë në ditë përjetuan një rrezik 135% më të lartë për vdekje nga sëmundjet kardiovaskulare krahasuar me ata që hëngrën gjatë 12-14 orëve.
Rreziku i shtuar për zemrën ishte i qëndrueshëm pavarësisht moshës, gjinisë apo stilit të jetesës, dhe ishte më i lartë tek duhanpirësit dhe personat me diabet ose sëmundje ekzistuese të zemrës. Megjithatë, lidhja me vdekjet nga çdo shkak tjetër ishte e dobët dhe e pasigurt.
Autorët e studimit theksojnë se kjo nuk provon shkakësinë, por sinjali është mjaft shqetësues për të sfiduar narrativën se agjërimi i ndërprerë është pa rreziqe. Studimi sugjeron që për individët me probleme të zemrës ose diabet, kufizimi i gjatë i dritares së të ngrënit mund të mos jetë i sigurt.
Ekspertët kujtojnë përfitimet e mundshme të agjërimit të ndërprerë: humbje peshe, përmirësim të ndjeshmërisë ndaj insulinës, ulje të tensionit të gjakut, dhe përfitime të mundshme anti-inflamatore. Por ekzistojnë edhe rreziqe: Mungesa e lëndëve ushqyese, kolesterol i lartë, uria e tepruar, dhimbje koke dhe vështirësi për t’u ndjekur afatgjatë.
Për ata që kanë diabet, agjërimi pa mbikëqyrje mund të shkaktojë rënie të rrezikshme të sheqerit në gjak, ndërsa për të moshuarit ose personat me sëmundje kronike, mund të përshpejtojë humbjen e muskujve.
Studimi i ri nxjerr në pah një paralajmërim të ri: lidhja e mundshme e agjërimit me rrezikun e lartë kardiovaskular, sidomos tek grupet e rrezikuara. Ekspertët rekomandojnë që dietat të personalizohen sipas gjendjes shëndetësore dhe të dhënave aktuale, duke vënë theksin më shumë tek ajo çfarë hani sesa tek ora kur hani.