Sëmundjet autoimune përbëjnë një grup të gjerë patologjish, të cilat, sipas ekspertëve po rriten vazhdimisht. Këto sëmundje nuk prekin vetëm një organ të caktuar, por mund të përfshijnë disa organe dhe sisteme trupore. Në muajin e Ramazanit shpeshherë pacientët me këto sëmundje përballen me dilema mbi ndikimin e agjërimit në shëndetin e tyre.
Sipas Dr. Mjellma Rexhepit, reumatologe në QKUK, është e rëndësishme që çdo pacientë të konsultohet me mjekun përpara se të vendosë të agjërojë, shkruan Gazeta Shneta.
“Agjërimi ka rëndësinë e vet por pacientët që agjërojnë duhet të marrin konsulta dhe një mendim nga mjeku – reumatologu i tyre”, potencoi ajo.
Tutje Dr. Rexhepi u shpreh se agjërimi mund të ketë ndikime pozitive dhe negative në organizëm te këta pacientë me sëmundje autoimune.
“Mungesa e ushqimit shkakton autofagi, ku kjo i shkatërron ato qeliza e dëmshme në organizmin e njeriut dhe i kthen në energji por nëse nuk kemi një pacientë të stabilizuar dhe ai nuk mund të marrë terapinë në kohën e duhur, agjërimi mund të shkaktojë përkeqësim të simptomave”, shpjegon ajo.
Sa i përket marrjes së ushqimeve, reumatologia Rexhepi këshillon se disa ushqime që mund të konsumohen gjatë periudhës së iftarit dhe syfyrit mund të ndihmojnë në uljen e inflamacionit.
“Produktet që përmbajnë omega-3 si peshku, sardinat, pastaj arrorët, farat chia, probiotikët, kosi kefiri dhe produktet shtazore. Preferohet që gjatë syfyrit të konsumohet një ushqim më i lehtë”, theksoi Dr. Rexhepi.
Për këto dhe këshilla të tjera ndiqni videon më poshtë: