Ekspozimi i zgjatur ndaj ajrit të ndotur mund të rrisë rrezikun për zhvillimin e demencës, ka zbuluar një studim i ri i publikuar në revistën “The Lancet Planetary Health”.
Ky është studimi më i madh deri më sot që konfirmon lidhjen mes ndotjes së ajrit dhe shëndetit të trurit, ndonëse ende nuk është kuptuar plotësisht mekanizmi biologjik që ndikon në këtë rrezik, raporton Euronews Health transmeton Gazeta Shneta.
Demenca prek rreth 57 milionë njerëz në botë dhe ndodh kur qelizat nervore në tru dëmtohen ose humbin lidhjet mes tyre. Deri tani, disa faktorë rreziku janë identifikuar – përfshirë ndotjen e ajrit – por nuk ka pasur qartësi mbi ndotësit më të rrezikshëm.
Studiuesit nga Universiteti i Kembrixhit analizuan të dhënat e 51 studimeve me gati 30 milionë pjesëmarrës, kryesisht nga vende me të ardhura të larta. Ata gjetën lidhje të forta midis demencës dhe ekspozimit ndaj grimcave të imta nga gazrat e makinave, termocentralet dhe pluhuri, si dhe ndaj dioksidit të azotit dhe blozës nga djegia e karburanteve.
Këto ndotës duket se kanë ndikim më të madh në demencën vaskulare sesa në sëmundjen e Alzheimerit.
Sipas studiuesve, ndotja e ajrit mund të shkaktojë inflamacion dhe stres oksidativ në tru – dy procese të lidhura me dëmtimin e qelizave dhe me fillimin e demencës. Megjithatë, mbetet e paqartë kur gjatë jetës ndotja ndikon më shumë
Studiuesit dhe organizatat e kujdesit për demencën i bëjnë thirrje qeverive të forcojnë rregullat për cilësinë e ajrit. “Shumë më tepër duhet bërë për të luftuar këtë kërcënim të padukshëm,” tha Dr. Isolde Radford nga Alzheimer’s Research UK. /Gazeta Shneta/