Njerëzit e ekspozuar ndaj niveleve më të larta të ndotjes së ajrit duket se kanë më shumë gjasa të zhvillojnë një lloj tumori në tru që zakonisht nuk shkakton kancer, por mund të çojë në probleme të tjera shëndetësore, ka zbuluar një studim i ri.
Meningiomat janë lloji më i zakonshëm i tumorit primar të trurit dhe rriten aq ngadalë sa mund të duhen vite para se të zbulohen. Ato burojnë nga membranat që rrethojnë trurin dhe palcën kurrizore.
Vetëm rrallë janë kancerogjene, por meningiomat mund të shkaktojnë paaftësi të tjera duke prekur indet, nervat ose enët e trurit aty pranë, shkruan Euronews, transmeton Gazeta Shneta.
Për studimin, studiuesit ndoqën gati katër milionë të rritur në Danimarkë gjatë një periudhe 21-vjeçare. Rreth 16,600 njerëz zhvilluan tumore të sistemit nervor qendror, përfshirë rreth 4,600 që zhvilluan meningiomë.
Studiuesit më pas vlerësuan nivelet e tyre të ekspozimit ndaj llojeve të ndryshme të ndotjes së ajrit, për shembull emetimet e trafikut dhe ndotja nga nafta, gjatë një dekade.
Njerëzit me më shumë ekspozim ndaj ndotjes së ajrit ishin në rrezik më të lartë për meningjomë, zbuloi analiza – por nuk kishte një lidhje të fortë midis ndotjes së ajrit dhe tumoreve më agresive të trurit, siç janë gliomat.
Rreziqet më të mëdha vinin nga grimcat ultra të imëta nga shkarkimet, tymi dhe emetimet.
Studimi nuk vërteton se ndotja e ajrit shkakton meningjomën, por vetëm se ekziston një lidhje midis të dyjave.
Por kjo i shtohet numrit gjithnjë e në rritje të provave se ndotja e ajrit është e dëmshme për shëndetin e njerëzve. Hulumtime të tjera kanë treguar se grimcat ultra të imëta mund të kalojnë barrierën gjak-tru dhe mund të dëmtojnë indet e trurit.
“Ndërsa kërkimet mbi efektet shëndetësore të grimcave ultra të imëta janë ende në fazat e hershme, këto gjetje tregojnë një lidhje të mundshme midis ekspozimit ndaj grimcave ultra të imëta të lidhura me trafikun dhe zhvillimit të meningjomës”, tha në një deklaratë Ulla Hvidtfeldt, një nga autoret e studimit dhe një shkencëtare e lartë në Institutin Danez të Kancerit.
Kjo tregon se “ndotja e ajrit mund të ndikojë në tru – jo vetëm në zemër dhe mushkëri”, shtoi Hvidtfeldt.
Gjetjet hedhin gjithashtu dritë të re mbi meningjomat, duke qenë se shkencëtarët nuk e dinë saktësisht se çfarë i shkakton ato. Rreziqe të tjera përfshijnë rrezatimin, veçanërisht në fëmijëri, dhe një gjendje gjenetike të quajtur Neurofibromatoza e tipit 2.
Studimi ka disa kufizime, veçanërisht se studiuesit vlerësuan ekspozimin e njerëzve ndaj ndotjes së ajrit bazuar në cilësinë e ajrit të jashtëm të lagjeve të tyre. Ai nuk përfshiu ekspozimin e mundshëm ndaj ajrit të ndotur në punë, ose nuk dhanë llogari për kohën që ata kalonin brenda.
“Nevojiten më shumë kërkime për të konfirmuar këto rezultate, por nëse pastrimi i ajrit tonë mund të ndihmojë në uljen e rrezikut të tumoreve në tru, kjo mund të bëjë një ndryshim të vërtetë për shëndetin publik”, tha Hvidtfeldt./Gazeta Shneta/