Drejtori i Klinikës së Obstetrikës dhe Gjinekologjisë, Zef Ndrejaj, në një intervistë dhënë për “Gazeta Blic” ka folur në lidhje me punën që po bëhet për të filluar me shërbimet për Fertilizim të Asistuar Mjekësor, IVF.Ndrejaj tha se infrstruktura dhe stafi janë të gati ndërsa pritet vetëm furnizimi me aparatura.
“Ministri Vitia është shumë aktiv nga ana e përmirësimit të kushteve sidomos në Klinikën e Gjinekologjisë. Janë disa projekte që po ecin paralelisht për renovim të Klinikës. Kemi projektin e fertilizimit in vitro (IVF) që është vetëm në fazën e tenderimit të furnizimit me aparatura. Këto janë procedura që nuk mund të anashkalohen në Kosovë, duhet të percillen me tendera dhe është kjo një pengesë derisa të realizohet ndërsa pjesa tjetër është e rregulluar si nga infrastruktura dhe stafi janë të gatshëm. Presim vetëm pjesën e aparaturave të na arrijmë dhe jemi të gatshëm me fillu me IVF” tha Ndrejaj. Ai nuk dha afate kohore se kur pritet me fillu ky shërbim.
“Për afate kohore se kur pritet me fillu ky proces është vështirë me fol për shkak se ka shumë aspekte që duhet të përcillen, duhet të percillet ligji dhe legjislatura dhe nuk mundem me dhan një afat të saktë. Dëshira jonë ka qenë që me kohë të fillohet gjatë këtij viti, por si po ecin punët me tenderë dhe me procedurat administrative pak është e vështirë të jepet një afat kohor. Dëshira dhe vullneti është i madh si nga Ministria e Shëndetësisë, si nga ministri Vitia dhe nga ne por afate kohore nuk mundem të jap saktësisht .
Ndrejaj tha se ka kërkesa shumë të larta për shërbimin e IVF-së.
Ai bëri të ditur se këto shërbime nuk pritet të jenë krejtësisht falas pasi ka harxhime të larta.“Ka kërkesa të larta për shërbimin IVF, për vetë faktin që është një shërbim i shtrenjtë, në privat shkon një intervenim diku deri 3-4 mijë euro atëherë edhe kërkesat janë të mëdha. Këto shërbime ndoshta nuk do të jenë edhe falas sepse është e pamundur se ka harxhime të mëdha mirëpo do të jetë një kosto më e ulët se në spitalet private” tha Ndrejaj./Gazeta Blic/