Ndryshimet klimatike po ndikojnë drejtpërdrejt në shëndetin e njerëzve duke rritur ndjeshëm sasinë e polenit në ajër dhe duke zgjatur sezonin e alergjive.
Ekspertët paralajmërojnë se temperaturat në rritje jo vetëm që përkeqësojnë simptomat sezonale, por mund të shkaktojnë edhe ngjarje ekstreme, si fenomeni i njohur si “astma nga stuhitë”.
Një rast dramatik ndodhi në vitin 2016 në Melburn të Australisë, kur një stuhi e fortë shkaktoi një shpërthim masiv të problemeve me frymëmarrjen. Grimcat e polenit u copëtuan nga lagështia, shiu dhe rrufetë, duke u kthyer në fragmente shumë më të vogla që depërtojnë lehtë në mushkëri.
Brenda pak orësh, spitalet u mbushën me pacientë dhe 10 persona humbën jetën. Ky fenomen ndodh kur stuhitë përhapin në ajër proteina alergjike që shkaktojnë reagime të forta, edhe te persona që nuk kanë pasur më parë astmë.
Poleni është thelbësor për riprodhimin e bimëve, por për shumë njerëz ai shkakton alergji sezonale. Sistemi imunitar e percepton atë si kërcënim, duke shkaktuar simptoma si teshtitje, kruarje të syve dhe rrjedhje të hundës. Në raste më të rënda, mund të shkaktojë vështirësi në frymëmarrje, shkruan BBC.
Me rritjen e temperaturave globale, sezoni i polenit po fillon më herët dhe po zgjat më shumë. Përveç kësaj, sasia e polenit në ajër është rritur ndjeshëm.
Në SHBA, për shembull, niveli i polenit është rritur me rreth 46% krahasuar me dekadat e mëparshme. Një nga faktorët kryesorë është rritja e dioksidit të karbonit (CO₂) në atmosferë, i cili nxit rritjen e bimëve dhe prodhimin e polenit, transmeton Gazeta Shneta.
Ndryshimet klimatike po rrisin gjithashtu frekuencën e fenomeneve ekstreme si stuhitë, duke shtuar rrezikun për ngjarje të rënda alergjike. Edhe pse këto raste mbeten të rralla, ato mund të bëhen më të shpeshta në të ardhmen.
Kombinimi i polenit, sezonit më të gjatë dhe kushteve ekstreme atmosferike po e bën jetën më të vështirë për miliona njerëz me alergji. Pa masa për uljen e ndotjes dhe ndryshimeve klimatike, situata pritet të përkeqësohet më tej. /Gazeta Shneta/