Një studim i ri nga Universiteti Duke në Shtetet e Bashkuara sugjeron se mënyra se si fëmijët mësojnë ta perceptojnë trupin dhe dhimbjen mund të ndikojë ndjeshëm në përmirësimin e dhimbjeve kronike të barkut.
Dhimbjet kronike abdominale prekin rreth 10 deri në 15 për qind të fëmijëve dhe konsiderohen ndër shkaqet kryesore të mungesave në shkollë dhe vështirësive në jetën familjare.
Studiuesit testuan dy qasje të ndryshme terapeutike te 107 fëmijë të moshës 5 deri në 9 vjeç.
Njëra terapi, e quajtur “Hetuesit e Ndjenjave dhe Trupit”, i mësonte fëmijët që ndjesitë e trupit dhe dhimbja të mos shiheshin si diçka për t’u frikësuar, por si sinjale që duhen kuptuar dhe eksploruar.
Ndërsa terapia tjetër, “Kujdestarët në Veprim”, përdorte metoda më tradicionale, duke i ndihmuar fëmijët ta largonin vëmendjen nga dhimbja përmes teknikave të shpërqendrimit dhe menaxhimit të simptomave.
Sipas rezultateve të publikuara në Revistën Amerikane të Gastroenterologjisë, të dyja terapitë çuan në ulje të intensitetit dhe kohëzgjatjes së dhimbjes, si dhe reduktuan ndikimin që problemet kishin në jetën familjare.
Autorja e studimit, Nancy Zucker, tha se shumë fëmijë me dhimbje kronike fillojnë ta shohin trupin e tyre si diçka të frikshme.
“Trajtimet tona u tregojnë fëmijëve se trupi i tyre mund të kuptohet dhe nuk duhet të shihet si armik”, tha ajo.
Studiuesit vlerësojnë se ndërhyrjet në moshë të hershme mund të ndikojnë jo vetëm në menaxhimin e dhimbjes, por edhe në mënyrën se si fëmijët përballen më vonë me stresin, emocionet dhe sinjalet e trupit.
Sipas studimit, 97 për qind e prindërve raportuan se fëmijët e tyre e kishin përjetuar terapinë në mënyrë pozitive dhe argëtuese.