Në orët e para të mëngjesit të ditës së sotme një pacient shkoi në Klinikën Emergjente në QKUK.
Ai u pranua rreth orës 3:05 me një lëndim në formë lokale dhe duke qenë se nuk kishte marr udhëzim nga Qendra e Mjekësisë Familjare, infermieri L.Th. i kishte kërkuar që raportin mjekësor ta merrte në recepsionin e Klinikës Emergjente.
Drejtori i Klinikës, Dr. Basri Lenjani, ka treguar për Gazeta Shneta se në këtë moment kanë filluar përplasjet pasi pacienti nuk ka pranuar të shkojë të marr udhëzimin.
“Në këtë moment kanë filluar përplasjet dhe fyerjet nga pacienti duke i thënë se ‘kush je ti me më thanë me shku me marr udhëzimin’. Pastaj kanë ndërhyrë personeli dhe e kanë larguar sulmuesin”, ka thënë Lenjani.
Ai ka shtuar se infermieri është goditur por nuk ka bërë raport mjekësor për lëndimet që i janë shkaktuar. Gazeta ka kontaktuar edhe me infermierin, por i njëjti nuk ka qenë në gjendje të flas për momentin.
Lenjani ka alarmuar për sulmet ndaj personelit mjekësor duke thënë se pasiguria po shkakton ikjen e tyre nga Kosova. “Mantelbardhët që shpëtojnë jetë nuk guxojnë të sulmohen. Nëse vazhdon kjo dhunë, atëherë po iu krijojmë kushte të ikin nga Kosova sepse nuk ka siguri”, ka deklaruar ai.
Me rastin është duke u marr edhe Policia e Kosovës e cila ka arrestuar autorin dhe e ka dërguar në mbajtje. Për rastin është informuar edhe Drejtori i Përgjithshëm i SHSKUK-së dhe Federata e Sindikatave të Shëndetësisë. /Gazeta Shneta/