Në Klinikën Infektive po trajtohen nëntë pacientë pozitiv me Covid-19, ku tre prej tyre janë në gjendje të rëndë.
Kështu ka deklaruar Prof. Salih Ahmeti në një deklaratë për Gazetën Shneta. Ai ka thënë se pacientët në gjendje të rëndë janë në përkujdesje intensive.
“Tre pacientë janë në gjendje të rëndë me përkujdesje intensive të ndihmuar me oksigjeno terapi, ndërsa gjendja e pacientëve tjerë është stabile dhe kanë përmirësime të gjendjes klinike dhe presim përmirësime edhe në aspektin mikrobiologjik”, ka deklaruar Ahmeti.
Infektologu ka thënë se dy persona janë në pritje të rezultateve, por gjatë ditës mund të vijë edhe ndonjë tjetër. Gjendja e përgjithshme në klinikë sipas tij është e qetë.
“Sa i përket numrit të të pranuarve në Klinikë, mund të them se e kem situatën e qetë. Ne kemi pas dje dy raste me manifestime të lehta klinike. Liria e lëvizjes do të duhej të ishte e kontrolluar dhe të ruhet distanca dhe të përdoren maskat. Ne nuk kemi shtim të numrit të rasteve në klinikë”, ka deklaruar Ahmeti.
Mjeku ka treguar se në mjekimin intensiv po vazhdon të trajtohet një pacient i cili ka rezultuar dy herë negativ në testin për koronavirus, por për shkak të problemeve tjera ka nevojë për trajtim klinik. /Gazeta Shneta/