Në Klinikën e Kirurgjisë Vaskulare në Qendrën Klinike Universitare të Kosovës ka shënuar një sukses të veçantë, duke kryer për herë të parë në vend një ndërhyrje kirurgjikale për Sindromën Eagle, një patologji e rrallë dhe komplekse.
Sindroma Eagle shkaktohet nga zgjatja jonormale e procesit stiloid në bazën e kafkës dhe manifestohet me dhimbje të forta në qafë dhe fyt, vështirësi në gëlltitje dhe, në raste të rralla, probleme me qarkullimin e gjakut për shkak të afërsisë me arteriet karotide.
Pacienti, M. D., mashkull i lindur më 1964, paraqiste simptoma të vazhdueshme. Pas ekzaminimeve të detajuara, u konstatua një zgjatje e procesit stiloid rreth 5.5 cm, që e bëri të domosdoshëm trajtimin kirurgjikal.
Operacioni u krye me sukses përmes qasjes ekstraorale, duke mundësuar kontroll të plotë të strukturave vitale vaskulare dhe nervore. Pacienti ka shfaqur përmirësim të menjëhershëm të simptomave dhe gjendja e tij është e qëndrueshme. Ai pritet të lirohet së shpejti për trajtim shtëpiak.
Ndërhyrja u realizua nga ekipi kirurgjikal: Dr. Hajriz Rudari, Dr. Lulzim Vokrri, Dr. Rame Gashani dhe Dr. Art Jaha, ndërsa ekipi i anestezionit përbëhej nga Dr. Alban Gjonbalaj dhe Dr. Zanita Ismajli. Instrumentaret ishin Antigona Tahiri./Gazeta Shneta/