Sipas një hulumtimi të Organizatës Botërore të Shëndetësisë, në vendet me të ardhura të ulëta dhe të mesme, 1 në 10 produkte medicinale janë të falsifikuara ose nën nivelin standard.
Kjo nënkupton që njerëzit në vendet si Kosova ku të ardhurat janë në këto nivele – po marrin barna që nuk arrijnë të trajtojnë ose parandalojnë sëmundjen, transmeton Gazeta Shneta.
Përveç dëmeve materiale që iu shkaktohen pacientëve, këto barna të falsifikuara mund të shkaktojnë edhe sëmundje të rënda apo edhe vdekjen.
“Imagjinoni një nënë që heq dorë nga ushqimi dhe nevojat tjera bazike, për të paguar barnat për trajtimin e fëmijës së saj. Kjo ndodh duke mos ditur që barnat janë jashtë standardit, ose të falsifikuara dhe kjo shkakton vdekjen e fëmijës”, ka deklaruar Dr. Tedros Adhanom, drejtor i Përgjithshëm i OBSH-së.
“Kjo është e papranueshme”, ka shtuar ai.
Që nga viti 2013, OBSH-ja ka marr 1500 raporte për barna jashtë standardeve dhe të falsifikuara.
Nga këto raporte rezulton se antibiotikët dhe antimalarikët janë më të falsifikuarat.
42 për qind e raporteve vijnë nga rajoni afrikan, 21 për qind nga Amerika dhe po aq nga Evropa. /Gazeta Shneta/