Kosovarët, shërimin për sëmundjet e tyre po mundohen ta gjejnë edhe në spitalet e Beogradit. Krejt kjo në mungesë të trajtimit të duhur shëndetësor në Kosovë për sëmundjet nga të cilat ata lëngojnë. Në Serbi, të bijën e saj, shpejtë mendon ta dërgojë për shërim edhe Fitorja. Vajza e saj, 3 vjeçe e gjysmë, Aridona, është diagnostikuar me një anomali të quajtur ‘Hidrocefalus’.
Nëna nga Fushë Kosova, Fitore Sejdiu, po kërkon ndihmë financiare që vajzën e saj, Aridonën vetëm 3 vjeçe e gjysmë ta dërgoj për shërim jashtë Kosovës. Vajza e saj, që nga lindja u diagnostikua më sëmundjen e “Hidrocefalus”. Do të thotë, në lindje, Aridona e vogël ka lindur me ujë në kokë. Problem ky i cili tash po ia vështirëson asaj jetesën.
Aridona, sot nuk mund të flas e as të ecë. Krejt kjo si pasojë e sëmundjes. Nëna e saj, Fitorja ka shpjeguar për Gazetën Express, rreth vështirësive me të cilat po ballafaqohet rreth trajtimit të vajzës së saj në QKUK e spitalet tjera private.
“Vajza ime i ka 4 vite e gjysmë. Nuk flet e as nuk ecë. Ka lindur me këtë problem. Por më kanë thënë që është i shërueshëm. Në Kosovë e kam pas tek shumë doktorë. Ku kam dëgjuar se ka mjek që e trajton sëmundjen e saj, unë e kam dërgua”, tregon nëna e 3-vjecares.
Por, pavarësisht se kjo grua thotë se e ka dërguar vajzën në mjek të ndryshëm në Kosovë, ajo thotë se sëmundja vetëm sa i është rënduar Aridonës.
Fitorja nga Fushë Kosova, tutje tregon se si po detyrohet që vajzën për analiza ta dërgojë jashtë QKUK’së.
“Trajtimi për të po është i kushtueshëm. Ilaçet nuk janë shumë shtrenjtë, por kontrollet tek mjekët shumë të shtrenjta. Analizat, asnjëra nuk po bëhen në spital. Po detyrohemi që t’i dërgojmë në klinika private”.
Kjo nënë, tashmë ka vendosur që vajzën e saj ta dërgojë për shërim në Serbi. Thotë se në spitalin e Beogradit i kanë premtuar zgjidhje për sëmundjen e vajzës së saj.
Por, që vajzën ta dërgojë atje, Fitorja sot po e kërkon ndihmën e qytetarëve. Ajo thotë se i duhen para për shërimin e 4-vjecares.
“E pash që këtu nuk ka zgjidhje, vajzën e dërgova në Beograd. E pash një rast si çika ime edhe e mora e dërgova. Në gusht të vitit të kaluar, vajzën e mora e çova në Beograd. Kur atje i panë letrat e kapën kokën. Më thanë se kjo sëmundje ka shërim. U habitshin se si fëmijë 3 vite e gjysmë mos t’i gjendet shërim në Kosovë”, rrëfen tutje nëna e Aridonës.
Tutje, ajo tregon se vetëm një natë në spitalet e Beogradit i kushton 200 euro.
“Atje më thanë që ka shërim. Por kontrollet po janë shumë shtrenjtë. Ne si familje nuk po mundemi me e përballu shërimin. 200 euro e më shumë do të kushtoje veç nata në spitalin e Beogradit. Shumat e gjëra nuk po mundemi që t’i përballojmë”, thërret për ndihmë nëna e 3 vjeçares.
E ky rast nuk është i vetmi kur kosovarët po i zgjedhin spitalet e Serbisë për shërim. Javë më parë edhe një familje nga Podujeva e kishin dërguar djalin e tyre Unikun, për shërim në spitalin e Beogradit.