Politika është problemi kryesornë shëndetësinë e vendit, sipas specialistit të neuropsikiatrisë, Afrim Blyta, i cili së fundmi ishte i ftuar në emisionin ‘Tête-à-Tête’ me Berat Buzhalën në T7.
Ai thotë se as ekspertët nuk mund të bëjnë zgjidhje për shëndetësinë në vend, e sipas tij kjo është edhe më e pamundur kur me këtë punë merren njerëz që nuk e kuptojnë problemin.
“Dallash është se ti si ekspert nuk mundesh me bo ndryshimin por duhet me bo ndryshimin dikush i cili nuk e kupton problemin. Normalisht ai i cili nuk e di problemin nuk ka me e dhënë zgjidhjen më të mirë’, thotë Blyta gjatë emisionit.
Duke shtuar se “Për shëndetësinë fatkeqësisht po vendosin ata që nuk kanë lidhje me shëndetësinë”, duke aluduar në ministrin e Shëndetësisë Uran Ismaili i cili nuk vjen nga fusha e mjekësisë.
Ai tha më tej se politika është thelluar jashtëzakonisht shumë duke bërë që edhe përgjegjësit e klinikave të jenë nga politika. Ai ka përmendur drejtorin e QKUK-së që sipas Blytës është një mjek specialist i zakonshëm, derisa ka edhe njerëz të tjerë të cilët kanë emër më të madh në këtë institucion si dhe përgatitje akademike.
“Përgjegjësit e klinikave janë eksponenta të politikës. Një pjesë e tyre definitivisht po. QKUK për shembull ka drejtor të klinikës i cili është mjek specialist i zakonshëm duke u nis prej asaj që në atë institucion ka edhe shumë më të vjetër, edhe shumë më të thirrur nga aspekti akademik shumë më të avancum që munden me qenë në atë pozicion”, thotë për fund Blyta.