Ministria e Shëndetësisë (MSh) bën të ditur se nga nesër do të fillojë karvani i vaksinimit kundër gripit sezonal, si dhe kundër COVID-19.
Sipas MSh-së, ky është një aktivitet shtesë një mujor me qëllim të promovimit të rritjes së numrit të të vaksinuarëve kundër gripit sezonal dhe kundër COVID-19, përcjell Gazeta Shneta.
Ky aktivitet është i organizuar nga Ministria e Shëndetësisë dhe Instituti Kombëtar i Shëndetësisë Publike, me mbështetjen e Organizatës Botërore të Shëndetësisë- Zyra në Prishtinë.
Më konkretisht nga data 22 dhjetor 2022 në Kosovë do të nis një aktivitet shtesë me qëllim të promovimit të vaksinimit kundër gripit sezonal dhe kundër COVID-19, i ashtuquajturi “Karvani i vaksinimit”.
Aktiviteti me titull “Karvani i vaksinimit” ka për qëllim të thekson njëherazi rëndësinë e vaksinimit kundër COVID-19 dhe gripit sezonal, duke parë rrezikun nga rritja e rasteve të infeksionit në vende të ndryshme të botës.
Duke u bazuar në këtë qëllim, në një periudhë prej më shumë se një muaji, në komunat e Kosovës, ekipet e vaksinimit do t’u mundësojnë qytetarëve që të vaksinohen përmes këtij aktiviteti.
Këtu vlen të ceket se objektivat kyçe të aktiviteti përfshijnë:
– Inkurajimi i qytetarëve për vaksinimit kundër COVID-19 dhe kundër gripit sezonal dhe promovimi i sjelljeve parandaluese dhe masave të shëndetit publik;
– Sigurimi që vaksinimi kundër gripit sezonal dhe COVID-19 të jetë lehtësisht i arritshëm në komunitetet lokale, veçanërisht për popullatën me të ndjeshme.
– Promovimi i pjesëmarrjes së drejtuesve të komunitetit në aktivitetet lokale për të adresuar pengesat në procesin e vaksinimit.
Për të vazhduar mbrojtjen kundër COVID-19, sigurohuni të merrni dozën bivalente përforcuese, të tretë ose të katërt!
Edhe pse vaksina bivalente kundër COVID-19 me variantet Omicron është aprovuar për përdorim te personat e moshës 12 vjeç e lart, si një dozë e vetme përforcuese, Instituti Kombëtar i Shëndetësisë Publike këshillon që me doza përforcuese bivalente të vaksinohen me prioritet personat mbi 60 vjeç, punëtorët shëndetësor, ata me imunitet te komprometuar (nga mosha 12 vjeç) dhe gratë shtatzëna.
Vaksina bivalente përforcuese kundër COVID-19 mund të bashkë-administrohet me vaksina të tjera, duke përfshirë vaksinën kundër gripit. /Gazeta Shneta/