Pas ngjarjeve të fundit tronditëse në Vushtrri janë marrë masa shtesë për të rritur sigurinë dhe për të garantuar një mjedis të sigurt për qytetarët.
Kryetari i Komunës së Vushtrrisë, Ferit Idrizi, ka njoftuar se sot Policia e Kosovës ka kryer disa kontrolle në tre shkolla, përfshirë SHMT “Lutfi Musiqi”, SHMP “Bahri Haxha” dhe Gjimnazin “Eqrem Çabej”.
I pari i komunës ka thënë se kontrollet janë realizuar me qëllim të verifikimit të sigurisë dhe për t’u siguruar që nuk kishte asnjë kërcënim të mundshëm për nxënësit dhe mësimdhënësit.
Më tutje në njoftim thuhet se gjatë këtyre kontrolleve, nuk është hasur asgjë e dyshimtë.
“Kjo është pjesë e një serie masash që do të vazhdojmë të implementojmë për të garantuar një mjedis të sigurt për të gjithë qytetarët dhe për të luftuar çdo formë të dhunës dhe pasigurisë. Ne do të qëndrojmë të angazhuar për të ofruar mbështetje dhe siguri për komunitetin tonë”, ka thënë ai.
Rikujtojmë që gjatë ditës së djeshme është mbajtur mbledhja urgjente e Këshillit për Siguri në Bashkësi në Komunën e Vushtrrisë.