Shërbimi Kombëtar i Shëndetit në Angli ka vendosur të ofrojë abirateronë, një ilaç i avancuar për kancerin e prostatës, edhe për burrat me diagnozë të hershme, kur sëmundja nuk është përhapur jashtë prostatës.
Ky vendim pritet të ndihmojë rreth 8,000 pacientë çdo vit dhe konsiderohet një hap i madh drejt përmirësimit të trajtimit të kancerit të prostatës në faza të hershme, shkruan The Guardian, transmeton Gazeta Shneta.
Abirateroni ka treguar se mund të ulë rrezikun e përparimit të sëmundjes dhe të rrisë shanset e mbijetesës kur përdoret së bashku me trajtime standarde si hormonet. Ekspertët e NHS theksojnë se ky ilaç mund të ndryshojë jetën e shumë pacientëve dhe mund të reduktojë ndjeshëm vdekjet e lidhura me këtë lloj kanceri.
Vendimi i Anglisë për të zgjeruar qasjen te ky ilaç e vendos atë në harmoni me Skocinë dhe Uellsin, ku pacientët tashmë kishin qasje në abirateron për fazat e hershme të kancerit. Kjo përbën një standard më të barabartë të kujdesit shëndetësor në Mbretërinë e Bashkuar dhe një shans të ri për pacientët që nuk kanë pasur trajtim të mjaftueshëm më parë.
Specialistët thonë se kjo ndryshim i politikës së NHS mund të shpëtojë mijëra jetë në vitet e ardhshme dhe është një shembull i përparimit të trajtimeve moderne kundër kancerit, duke kombinur teknologjitë e reja mjekësore me politikat e shëndetit publik. /Gazeta Shneta/