Tashmë Ferizaj dhe qytetet në afërsi do ta kenë spitalin e tyre, derisa gurthemelin e këtij spitali e ka vënë sot Kryetari i Kuvendit, Kadri Veseli.
I pari i Kuvendit ka kujtuar kohën kur Ferizaj ka qenë Qendër Kryesore e Mjekësisë Ushtarake, por nuk ka harruar të përmend se është vendi ku qytetarët paguajnë më së shumti taksat.
Në anën tjetër, Kryeministri i Kosovës, Ramush Haradinaj, tha se me fillimin e këtij ndërtimi të spitalit të ri me të është vënë edhe drejtësia në vend, duke pas parasysh që një regjion i madh si Ferizaj nuk ka pasur deri më tani spital.
“Na ka bashku një festë nuk e di që ka një festë më të madhe jo vetëm për këtë treve sepse po bëhet një drejtësi..një qendër kaq e madhe sa është Ferizaj nuk ka pas qendër spitalore dhe më vjen mirë që Kosova po e vendos këtë të drejtë në vendin e vet. Është një projekt shumë i madh është 10 milionë e tutje. Më vjen mirë se për këtë projekt ka pas të kryetarit Veseli, por dua të them.se edhe ministri Uran Ismaili e ka kryer pjesën e vet, ka thënë Haradinaj.
Ndërkaq, Ministri i Shëndetësisë, Uran Ismaili, thotë se ky Spital do të përfundojë me një afat kohor më shpejt sa është planifikuar.
“Një ditë shumë e mirë një ditë kur në diskutimet tona të para me Agim Aliun me punëtorët mjekësor nuk besonin që do ta nisnim. Sot po besoj që jemi faqebardhë si Qeveri e republikës së Kosovës që kemi ardhur dhe e fillojmë gurthemelin e një spitali që do të jetë një spital modern. Spitali i Ferizajt do të jetë një vend një projekt që të gjithë do të krenohen me të po besoj që do të iu merr lakmi edhe Prishtina edhe qytetarët e tjerë. Do të fillojmë edhe punët e thera në mjekësinë primare. Do të jetë më herët se tre vite. Do ta përfundojmë më herë se tre vite’’, ka përfunduar Ismaili.
Kryetari i Ferizajt, Agim Aliu, në ceremoninë e vënies së gurthemelit të spitalit, tha se kjo ditë është ëndërr e shumë gjeneratave.
Kujtojmë që shuma totale e këtij spitali pritet të jetë me vlerë prej 10 milionë e 235 mijë euro./FerizajPress/