Një ngjarje tragjike ka ndodhur sot në lagjen Emshir në Prishtinë.
Rreth orës 10:00 të mëngjesit, autoritetet policore u njoftuan për një incident ku një person ishte gjetur i lënduar dhe i shtrirë në rrugë.
Zëdhënësja e policisë për rajonin e Prishtinës, Flora Ahmeti, tha për Telegrafin se 29-vjeçari u transportua me urgjencë në QKUK për tretman mjekësor, por nuk u mbijetoi plagëve.
“Rreth orës 10:00, kemi pranuar informatën për një person të lënduar (shtrirë në rrugë), në lagjen Emshir në Prishtinë. Policia menjëherë ka dalë në vendin e ngjarjes si dhe mjekët emergjent të cilët e kanë dërguar për tretman mjekësor në QKUK, ku rreth orës 11:00, kanë konstatuar vdekjen e viktimës, mashkull , 29 vjeç”, u shpreh ajo.
Policia e Kosovës, në bashkëpunim të ngushtë me prokurorinë shtetërore, ka nisur një hetim për të zbuluar shkaqet e vdekjes.
Hetuesit janë duke ndërmarrë të gjitha veprimet e nevojshme hetimore, duke përfshirë ekzaminimin e skenës së krimit dhe kërkimin për dëshmitë që mund të jenë të lidhura me ngjarjen.
Qëllimi është të ofrohet një pasqyrë e qartë e rrethanave që çuan në këtë fatkeqësi dhe, në rast se dyshohet për veprim kriminal, të identifikohen dhe ndiqen përgjegjësit ligjërisht.
Autoritetet nuk kanë dhënë detaje të tjera në lidhje me identitetin e viktimës ose rrethanat e ngjarjes në këtë fazë të hetimit./Telegrafi/