Një test i ri gjaku i miratuar së fundmi mund ta bëjë më të lehtë dhe më pak të kushtueshëm zbulimin e sëmundjes Alzheimer, duke i ndihmuar mjekët të vendosin diagnozën dhe të nisin trajtimin në fazat e hershme.
Aktualisht, diagnoza zakonisht kërkon teste të shtrenjta si skanimet PET ose marrjen e lëngut kurrizor, të cilat mund të jenë të parehatshme dhe të vështira për t’u aksesuar.
Testi i ri, i quajtur ‘Lumipulse’, kërkon vetëm një marrje të zakonshme gjaku për të matur nivelet e dy proteinave: pTau217 dhe beta-amiloid 1-42, të cilat tregojnë praninë e pllakave amiloide në tru—një shenjë tipike e Alzheimerit, shkruan burimi Very Well Health transmeton Gazeta Shneta.
Testi është miratuar nga FDA për personat mbi 55 vjeç që shfaqin shenja të dëmtimit të kujtesës.
Në një studim klinik me 499 pacientë, rezultoi se testet pozitive përputheshin me skanime ose analiza lëngu kurrizor në rreth 92% të rasteve, ndërsa ato negative në 97%.
Kjo analizë mund të përmirësojë përdorimin e barnave të reja si Leqembi dhe Kisunla, të cilat ngadalësojnë progresin e sëmundjes vetëm nëse jepen në fazat e hershme. Deri tani, përdorimi i tyre ka qenë i kufizuar, pasi mungonin testet e hershme të aksesueshme.
Testi Lumipulse është i pari i miratuar nga FDA dhe mund të përdoret nga mjekët e familjes për të bërë një vlerësim fillestar dhe për të ndihmuar në referimin e pacientëve te specialistët.
Një sondazh i Asociacionit të Alzheimerit tregoi se 80% e njerëzve do donin ta dinin nëse kishin Alzheimer para se të shfaqnin simptoma, dhe mbi 90% do e bënin testin nëse do ishte i disponueshëm.
Ndërkohë që priten edhe shtatë teste të tjera gjaku në zhvillim, ekspertët po hartojnë udhëzime të reja klinike për përdorimin e tyre. /Gazeta Shneta/