Një studim i ri tregon se një analizë e thjeshtë gjaku mund të parashikojë rrezikun e ardhshëm për zhvillimin e sëmundjes së Krohn-it, shumë vite përpara se të shfaqen simptomat e para. Kjo hap mundësi të reja për diagnostikim të hershëm, trajtim më efektiv dhe madje edhe parandalim të sëmundjes.
Rezultatet e studimit u publikuan më 12 janar në revistën “Clinical Gastroenterology and Hepatology”. Testi mat reagimin e sistemit imunitar ndaj flagelinës, një proteinë që gjendet në bakteret e zorrëve. Sipas studiuesve, ky reagim imunitar është i rritur tek individët që më vonë zhvillojnë sëmundjen e Krohn-it, shumë kohë para shfaqjes së simptomave, shkruan burimi Health Day transmeton Gazeta Shneta.
Sipas autorit kryesor, Dr. Kenneth Croitoru nga Instituti Kërkimor Lunenfeld-Tanenbaum në Toronto, qëllimi ishte të zbulohej nëse personat aktualisht të shëndetshëm, por me rrezik të lartë, kishin antitrupa kundër flagelinës.
Matjet konfirmuan se një pjesë e tyre vërtet i kishin këta antitrupa në nivele të larta.
Sëmundja e Krohn-it shkakton inflamacion kronik të traktit gastrointestinal dhe shoqërohet me simptoma si diarre e vazhdueshme, gjakderdhje rektale, dhimbje barku dhe kapsllëk. Në këtë studim, studiuesit krahasuan 77 të afërm të personave me Krohn që më pas e zhvilluan sëmundjen, me 304 të tjerë që nuk u prekën.
Rezultatet treguan se më shumë se një e treta e atyre që zhvilluan Krohn-in kishin reagim të rritur ndaj flagelinës, veçanërisht vëllezërit dhe motrat. Ky reagim u shoqërua gjithashtu me inflamacion të zorrëve dhe çrregullime të funksionit të tyre.
Mesatarisht, sëmundja u shfaq rreth dy vjet e gjysmë pas zbulimit të antitrupave në gjak. Sipas studiuesve, kjo zbulon një mekanizëm të ri të mundshëm në zhvillimin e Krohn-it dhe ofron një objektiv të ri për kërkime të ardhshme në trajtimin dhe parandalimin e kësaj sëmundjeje. /Gazeta Shneta/