Një banore e moshës 80-vjeçare në Shtëpinë e Pleqve në Prishtinë, ka rezultuar pozitive me Covid-19.
Gazeta Shneta ka mësuar nga burime se bëhet fjalë për një grua të moshës 80-vjeçare, e cila është testuar nga Instituti Kombëtar i Shëndetit Publik pasi kishte shfaqur disa simptoma dhe e njëjta ka rezultuar pozitive.
Gazeta ka kontaktuar drejtoreshën e këtij institucioni Raza Aliçkaj, por e njëjta nuk ka mundur ta konfirmoj zyrtarisht këtë lajm.
“Kemi pas një banore e cila ka shfaqur disa shenja klinike dhe kemi ftuar IKSHPK-në për ta testuar. Ajo është në gjendje të mirë shëndetësore dhe është e izoluar në dhomën e saj. Nuk mund të flas më tepër se kaq”, ka deklaruar Aliçkaj.
Drejtori i Zyrës për Informim në Ministrinë e Punës dhe Mirëqenies Sociale, Musa Demiri, ka deklaruar se nuk kanë informacion për këtë rast pasi janë duke punuar me staf të reduktuar.
Ky është rasti i parë i infektimit me Covid-19 në një shtëpi të moshuarve në Kosovë. /Gazeta Shneta/