Një CT dhe një rëntgen që disa muaj kanë mbetur jashtë funksionit në Klinikën e Radiologjisë në QKUK. Këto pajisje nuk janë duke punuar për shkak të prishjeve.
Njëra nga aparaturat e tomografisë së kompjuterizuar (CT) e cila gjendet në Klinikën e Onkologjisë në QKUK, është jashtë funksionit që disa muaj për shkak të një prishje, shkruan Gazeta Shneta.
Nga QKUK kanë thënë se kësaj pajisje i është prishur një pjesë e cila quhet “detektor” që nga 7 korriku i këtij viti dhe ende nuk është rregulluar pasi e njëjta nuk është e përfshirë në kontratën e mirëmbajtjes.
“CT64, është në servisim dhe mirëmbajtje nga Operatori Ekonomik, është jashtë funksionit nga 07.07.2023 për shkak të defekteve me detektorë. Detektorët nuk janë pjesë e kontratës së mirëmbajtjes. Kontrata për blerjen e detektorëve është në proces e sipër nga sektori i prokurimit dhe shumë shpejtë pritet nënshkrimi i kontratës për ndërrimin e tyre”, thuhet në përgjigjen e Berat Krasniqit, shef i Sektorit të Mirëmbajtjes së Pajisjeve Mjekësore në QKUK.
Kjo CT përdoret për nevoja të pacientëve të hospitalizuar dhe ambulantor në Klinikën e Onkologjisë si dhe të klinikave tjera. Në QKUK janë edhe CT të tjera.
Për shkak të prishjes së “detektorit” ka mbetur jashtë funksionit edhe një rëntgen dixhital i cili është nën garancion por operatori ekonomik ende nuk e ka rregulluar.
“Një rentgen dixhital që është blerë përmes Bankës Botërore në Kliniken e Neonatologjise është nën garancion, nuk është funksional për shkak të dëmtimit të dektorit. Pasiqë i njëjti është nën garancion, Operatori Ekonomik e ka bërë porosinë e detektorit dhe pritet instalimi dhe funksionalizimi të bëhet brenda javës”, thuhet në përgjigjen e Krasniqit.
Në Klinikën e Radiologjisë poashtu ka probleme edhe me funksionimin e ventilimit i cili kohë pas kohe del jashtë funksionit. Ventilimi në Radiologji është mjaft i rëndësishëm për të mbrojtur shëndetin e punëtorëve shëndetësor për shkak të tërheqjes së rrezeve të pajisjeve nga ambientet e punës. Për këtë çështje nuk janë përgjigjur nga QKUK. /Gazeta Shneta/