Studime të reja po tregojnë se vetëm një dozë e vaksinës kundër HPV-së mund të jetë e mjaftueshme për të mbrojtur njerëzit nga infeksioni dhe kanceret që lidhen me këtë virus.
HPV, ose virusi human papilloma, transmetohet kryesisht përmes kontakteve seksuale dhe në disa raste mund të shkaktojë kancer të qafës së mitrës, anusit, penisit, vaginës dhe fytit. Sipas ekspertëve, vaksina mund të parandalojë rreth 90% të këtyre rasteve, shkruan burimi Very Well Health transmeton Gazeta Shneta.
Aktualisht, vaksina HPV rekomandohet në dy ose tre doza, gjë që shpesh i pengon njerëzit ta marrin atë.
Megjithatë, kërkimet e fundit kanë treguar se edhe një dozë e vetme ofron mbrojtje shumë të lartë.
Një studim i zhvilluar në Kenia zbuloi se një dozë ishte mbi 97% efektive kundër tipeve HPV16 dhe HPV18, të cilat shkaktojnë shumicën e rasteve të kancerit të qafës së mitrës.
Organizata Botërore e Shëndetësisë (OBSH) tashmë rekomandon një ose dy doza për vajzat dhe gratë e reja nga mosha 9 deri në 20 vjeç. Shumë vende kanë filluar ta zbatojnë këtë qasje, pasi një dozë është më e lirë dhe më e lehtë për t’u administruar.
Ekspertët besojnë se kalimi në një dozë të vetme mund të rrisë numrin e personave të vaksinuar, sidomos tek familjet me të ardhura të kufizuara ose pa sigurim shëndetësor.
Përveç kostos më të ulët, kjo do të kursente kohë dhe do të reduktonte pengesat praktike për marrjen e vaksinës. /Gazeta Shneta/