Tri vdekje të dyshimta kanë ndodhur në dy muajt e fundit në Spitalin e Përgjithshëm të Pejës. Një grua ndërroi jetë së bashku me foshnjën e saj para dy muajsh, ndërsa para një jave një fëmijë vdiq në QKUK pasi ishte trajtuar në Spitalin e Pejës
Rreth 2 muaj më parë Nurie Rexhahmetaj, 41, kishte shkuar për të lindur fëmijën e saj të tretë por në rrethana ende të panjohura lindi foshnjën e vdekur ndërsa ndërroi jetë edhe vet disa orë më vonë, shkruan Gazeta Shneta.
Familjarët kanë akuzuar stafin mjekësor ndërsa kanë paralajmëruar edhe padi ndaj tyre. Ata dyshojnë se mjekët kanë gabuar që pacienten e kanë futur në lindje natyrale. Sipas familjarëve, gruaja kishte kollabuar si pasojë e gjakderdhjes pas lindjes së foshnjës.
Në anën tjetër, në raportin e Spitalit thuhet se gruaja kishte pësuar çarje të mitrës gjatë lindjes dhe pas 4-5 orësh përpjekje mjekët nuk kishin arritur ta ndalnin gjakderdhjen që si pasojë pati humbjen e faktorëve të koagulimit dhe gjakut dhe vdekjen e pacientes. Në këtë rast është kryer autopsia dhe po priten rezultatet.
Ndërkaq në rastin e fëmijës 6-vjeçar nuk është kryer autopsi pasi nuk kanë lejuar familjarët. Fëmija u trajtua fillimisht në Spitalin e Pejës më datën 16 prill. Në vizitën e parë fëmija u lëshua për në shtëpi me terapi për skuqje të fytit, ndërsa në vizitën e dytë në të njëjtën ditën fëmija pranohet në spital dhe humb vetëdijen. Pas më shumë se dy orësh transportohet për në Klinikën Infektive në QKUK. Në këtë të fundit pranohet në gjendje kome dhe jetën për më pak se 30 minuta.
Familjarët kanë ngritur dyshime mbi trajtimin e mjekëve dhe vonesën e autoambulancës për ta sjellë në QKUK. Gjyshja e të ndjerit ka thënë se autoambulanca është vonuar me arsyetimin se nuk kishte pasur shofer.
Këtë e kanë mohuar zyrtarët e spitalit duke thënë se autoambulanca ka qenë e gatshme brenda 10 minutave. Në raportin e spitalit thuhet se fëmija nuk kishte qenë në gjendje për transport për rreth 2 orë. Me këtë rast po merret Inspektorati Shëndetësor dhe Prokuroria Themelore. /Gazeta Shneta/