Njëra nga sallat e stentimit në QKUK, përkatësisht në Klinikën e Kirurgjisë Invazive është jashtë funksionit.
Për shkak të mos funksionimit të njërës nga sallat e kateterizimit ku kryhen koronarografitë dhe stentimet në shërbimin e Kardiologjisë Invazive, është rritur edhe numri i pacientëve në listë të pritjes. E kjo listë tanimë ka arritur në mbi 9 muaj, shkruan Gazeta Shneta.
Mos funksionimin e sallës e ka konfirmuar drejtori i Klinikës së Kardiokirurgjisë me Kardiologji Invazive Rifat Brahimaj. Ai ka thënë se salla është në rinovim, por nuk ka treguar se për çfarë rinovimi ose defekti bëhet fjalë?
“Nuk është rregullu, ende nuk është riparu, salla është ende duke u rinovuar, është në riparim, merr pak kohë por riparimi përfundon së shpejti. Para një ose dy jave besoj që do të jetë funksionale”, tha Brahimaj.
Gazeta ka raportuar edhe ditë më parë për problemet në këtë sallë, gjë që ka bërë të shtyhet edhe një mision i mjekëve amerikanë dhe italianë për trajtimin e rreth 30 fëmijëve me probleme në zemër.
Listat e pritjes janë një nga problemet që po e përcjellin shëndetësinë tash e disa vite. Numri i pacientëve që presion për shërbime është rritur edhe për shkak të pezullimit të punës gjatë pandemisë vitin e kaluar.
Lista të gjata të pritjes me muaj e vite ka edhe në Klinikën e Radiologjisë, Ortopedisë dhe Vaskulares. /Gazeta Shneta/