Normat e vaksinimit kundër poliomielitit shënuan rënie në Europë dhe Azinë Qendrore vitin e kaluar, duke lënë rreth 450,000 foshnja të pambrojtura ndaj kësaj sëmundjeje shumë ngjitëse, sipas Organizatës Botërore të Shëndetësisë (OBSH).
Poliomieliti, i njohur si polio, mund të sulmojë sistemin nervor dhe në raste të rënda shkakton paralizë. Ndërsa dikur paralizonte 350,000 fëmijë në vit globalisht, fushatat masive të vaksinimit pothuajse e kanë zhdukur sëmundjen nga planeti, shkruan Euronews Health transmeton Gazeta Shneta.
Qendra Evropiane për Parandalimin dhe Kontrollin e Sëmundjeve (ECDC) rekomandon që të paktën 90% e popullsisë të jetë e vaksinuar për të parandaluar përhapjen e virusit të poliomielitit.
Në vitin 2024, niveli i vaksinimit në rajonin evropian të OBSH-së, që përfshin 53 vende të Europës dhe Azisë Qendrore, ishte 93% – niveli më i ulët që nga viti 2017, për shkak të rënies së vaksinimeve rutinë tek fëmijët.
Në disa vende, mbulimi është shumë më i ulët, si në Rumani, ku vetëm 79% e fëmijëve morën dozën e tretë të vaksinës vitin e kaluar.
Virusi i poliomielitit është zbuluar në ujërat e zeza të gjashtë vendeve të rajonit që nga vjeshta e kaluar, përfshirë Gjermaninë, Finlandën, Izraelin, Poloninë, Spanjën dhe Mbretërinë e Bashkuar.
Megjithatë, niveli i lartë i vaksinimit ka parandaluar raste të vërteta apo përhapje komunitare.
OBSH paralajmëron se boshllëqet në mbulimin e vaksinimit lënë fëmijët të pambrojtur dhe rrisin rrezikun për shëndetin publik.
Ekspertët kërkojnë survejim më të fuqishëm dhe nxitje të vaksinimeve për të parandaluar rikthimin e poliomielitit dhe për të mbrojtur shëndetin e rajonit dhe më gjerë. /Gazeta Shneta/