Një studim i ri tregon se personat me obezitet kanë 70% më shumë rrezik të përjetojnë infeksione serioze, ndërsa një në dhjetë vdekje nga sëmundjet infektive në nivel global mund të lidhet me obezitetin.
Studimi, botuar në “The Lancet”, analizoi të dhëna nga mbi 67,000 të rritur në Finlandë dhe mbi 470,000 në UK Biobank, duke matur indeksin e masës trupore (BMI) dhe duke i klasifikuar individët në grupe si ‘pesha të shëndetshme’, ‘mbi peshë’ dhe ‘obezë’.
Rezultatet treguan se personat me obezitet kanë 70% më shumë gjasa për t’u hospitalizuar ose për të vdekur nga sëmundje infektive si gripi, COVID-19, pneumoni apo gastroenteriti.
Rreziku rritet proporcionalisht me peshën; individët me obezitet të klasës III (BMI ≥40 kg/m²) kanë trefishin e rrezikut krahasuar me ata me peshë të shëndetshme, raporton Euronews Health transmeton Gazeta Shneta.
Studiuesit sugjerojnë se obeziteti mund të dobësojë sistemin imunitar, duke bërë trupin më të ndjeshëm ndaj baktereve, viruseve, parazitëve dhe kërpudhave.
Bazuar në këto të dhëna, studiuesit parashikuan se 9–11% e vdekjeve nga infeksionet globalisht mund të parandalohet nëse eliminohet obeziteti, me variacione të mëdha sipas vendit – nga 25.7% në SHBA deri në 3.8% në Kinë.
Obeziteti po rritet gjithashtu në Evropë, ku 17% e të rriturve janë obezë dhe 51% mbi peshë, duke përfaqësuar një “epidemi” sipas OBSH-së.
Strategjitë e shëndetit publik synojnë të përmirësojnë stilin e jetesës, ushqimin e shëndetshëm dhe aktivitetin fizik për të ulur këto rreziqe dhe për të parandaluar sëmundjet e lidhura me obezitetin. /Gazeta Shneta/