Organizata Botërore e Shëndetësisë (OBSH) ka nxjerrë në dritë një alarm lidhur me konsumimin e alkoolit nga të rinjtë në Europë, duke theksuar se 1 në 4 adoleshentë të moshës 15-19 vjeç konsumojnë alkool, përfshirë edhe Shqipërinë.
Europa është identifikuar si rajoni me nivelin më të lartë të konsumit të alkoolit për frymë në botë. Ekspertët shprehin shqetësim për faktin se adoleshentët që kanë qasje në alkool në mjedisin e shtëpisë janë më të prirur të fillojnë konsumimin në moshë të hershme.
Konsumimi i alkoolit gjatë adoleshencës ka pasoja serioze, duke përfshirë dëme në shëndetin mendor, performancë të ulët shkollore, si dhe rreziqe afatgjata për shëndetin, duke përfshirë mundësinë për zhvillimin e sëmundjeve kronike si ato të zemrës, mëlçisë dhe kancerëve të shumtë në moshë të rritur.
Studimet e fundit tregojnë se 1 në 4 vdekje tek të rinjtë nga 19 deri në 24 vjeç në Rajonin Europian të OBSH-së janë të lidhura me konsumimin e alkoolit, duke përfshirë aksidente, mbytje dhe vetëvrasje.
Në këtë kontekst, ekspertët e shëndetit publik theksojnë nevojën për ndërgjegjësim dhe veprime të menjëhershme për të parandaluar këtë fenomen.