Një raport i fundit i Organizatës Botërore të Shëndetësisë (WHO) tregon se vendet e Evropës dhe Azisë Qendrore po zbatojnë inteligjencën artificiale (AI) në sektorin e shëndetësisë, por shpesh pa masa të mjaftueshme për mbrojtjen e pacientëve dhe stafit mjekësor.
Sipas analizës së WHO-së, përdorimi, rregullimi dhe financimi i AI në shëndetësi ndryshon ndjeshëm mes 50 vendeve të përfshira në studim. Gati gjysma e tyre kanë futur chatbot-e për pacientët, ndërsa 32 vende përdorin mjete diagnostikuese të bazuara në AI, kryesisht në imazhe dhe zbulim sëmundjesh.
AI po përdoret gjithashtu për skanimin e pacientëve, analizën e të dhënave, shëndetin mendor, detyra administrative dhe planifikimin e stafit, shkruan Euronews transmeton Gazeta Shneta.
Megjithatë, vetëm 26 vende kanë përcaktuar prioritetet për AI në shëndetësi dhe vetëm 14 prej tyre kanë siguruar fonde për këto iniciativa. Vetëm katër vende – Andorra, Finlanda, Sllovakia dhe Suedia – kanë strategji kombëtare të dedikuara për AI në shëndetësi.
Dr. Hans Kluge nga WHO paralajmëroi se pa “strategji të qarta, mbrojtje të të dhënave, korniza ligjore dhe investime në njohuri për AI”, përdorimi i këtyre teknologjive mund të thellojë pabarazitë shëndetësore. Ai shtoi se gabimet mjekësore mund të ndodhin për shkak të të dhënave të paplota, të pasakta ose të paragjykuara që përdoren nga AI.
Raporti rekomandon që vendet evropiane të harmonizojnë strategjitë e AI me objektivat e shëndetit publik, të trajnojnë stafin shëndetësor, të forcojnë ligjet dhe udhëzimet etike, dhe të sigurojnë transparencë për publikun mbi përdorimin e AI në shëndetësi.