Organizata Botërore e Shëndetësisë (OBSH) ka prezantuar një version të ri dhe të zgjeruar të udhëzimeve për mbrojtjen e popullsisë nga valët ekstreme të të nxehtit, duke paralajmëruar se temperaturat e larta po bëhen një kërcënim gjithnjë e më serioz për shëndetin publik.
Sipas OBSH-së, Europa është rajoni që po ngrohet më shpejt në botë dhe ndryshimet klimatike po rrisin ndjeshëm numrin e sëmundjeve dhe vdekjeve të lidhura me nxehtësinë ekstreme, transmeton Gazeta Shneta.
Valët e të nxehtit mund të rëndojnë sëmundjet kardiovaskulare, të shkaktojnë dehidrim, goditje nga nxehtësia dhe komplikime të tjera serioze shëndetësore.
Dokumenti i ri përfshin tetë elemente kryesore, mes tyre sistemet e paralajmërimit të hershëm, identifikimin e grupeve më të rrezikuara, forcimin e kapaciteteve të spitaleve dhe komunikimin më efektiv me qytetarët gjatë periudhave me temperatura ekstreme.
OBSH thekson se më të rrezikuarit janë të moshuarit, foshnjat, gratë shtatzëna, personat me sëmundje kronike dhe punëtorët që ekspozohen për periudha të gjata në ambiente të hapura.
Organizata rekomandon shmangien e aktiviteteve fizike gjatë orëve më të nxehta të ditës, hidratimin e rregullt dhe mbajtjen e ambienteve sa më të freskëta. /Gazeta Shneta/