Pas vdekjes së më shumë se 300 fëmijëve nga shurupi i kontaminuar i kollës, OBSH bëri thirrje të hënën për “veprim të menjëhershëm dhe të koordinuar” për të çrrënjosur ilaçet nën standarde dhe të falsifikuara në mbarë botën.
Të paktën shtatë vende kanë raportuar incidente që përfshijnë shurupe të kollës pa recetë për fëmijët gjatë katër muajve të fundit, ka njoftuar Organizata Botërore e Shëndetësisë (OBSH) në një deklaratë, shkruan AFP përcjell Gazeta Shneta.
Më shumë se 300 vdekje të lidhura me kontaminim janë regjistruar në tre prej këtyre vendeve – Gambia, Indonezia dhe Uzbekistani -, duke shtuar se shumica e vdekjeve ishin në mesin e “fëmijëve të vegjël nën moshën pesë vjeç”.
Incidentet e raportuara përfshijnë kontaminim të konfirmuar ose të dyshuar të shurupeve të kollës të prodhuara nga India me nivele të larta të dietilen glikolit dhe etilen glikolit.
“Këta ndotës janë kimikate toksike që përdoren si tretës industrialë dhe agjentë antifriz që mund të jenë fatale edhe nëse merren në sasi të vogla”, paralajmëroi OBSH.
Ato “nuk duhet të gjenden kurrë në ilaçe”.
OBSH ka lëshuar paralajmërime kundër përdorimit të shurupeve të kollës të zhvilluara nga firmat indiane Marion Biotech dhe Maiden Pharmaceuticals në lidhje me vdekjet e dyshimta.
Ndër të tjera, OBSH u bëri thirrje vendeve që të rrisin përpjekjet për të zbuluar dhe hequr çdo ilaç të kontaminuar nga qarkullimi, për të rritur mbikëqyrjen brenda zinxhirëve të furnizimit dhe për të dhënë menjëherë alarmin nëse gjendet ndonjë prej produkteve nën standarde e kërkuara. /Gazeta Shneta/