Amazon po shton një program zbritjeje të barnave me recetë në biznesin e saj në rritje të kujdesit shëndetësor.
Gjigandi i shitjes me pakicë tha të martën se do të nisë projektin ‘RxPass’, një shërbim abonimi për klientët që kanë anëtarësim në Prime, shkruan burimi The Associated Press, përcjell Gazeta Shneta.
Amazon ka njoftuar se njerëzit do të paguajnë 5 dollarë në muaj për të plotësuar aq receta sa u nevojiten nga një listë me rreth 50 medikamente gjenerike, të cilat në përgjithësi janë versione më të lira të barnave me emër tregtar.
Kompania tha se tarifa e sheshtë mund të mbulojë një listë me medikamente si antibiotiku amoxicillin dhe bari anti-inflamator naproxen.
Në listë hyri edhe Sildenafili. Përdoret për të trajtuar disfunksionin erektil nën emrin e markës Viagra dhe gjithashtu trajton një formë të presionit të lartë të gjakut.
Amazon shet një sërë barnash gjenerike përmes shërbimit të saj të farmacisë.
Disa tashmë kushtojnë deri në 1 dollarë për një furnizim 30-ditor, kështu që përfitimi i këtij programi të ri do të ndryshojë sipas klientit.
Ky projekt do të jetë i disponueshëm në 42 shtete dhe në Uashington DC që në fillim.
Në nëntor, kompania ka thënë gjithashtu se do të fillonte të ofronte “Amazon Clinic”, një shërbim mesazhesh që lidhë pacientët me mjekët për kushte të shumta e të zakonshme, të tilla si alergjitë dhe rënia e flokëve. /Gazeta Shneta/